«Колумб лудмаш» регион-влак кокласе сылнымут да мурсем фестиваль-конкурс тений Морко районысо Мызэҥер ялыште эртаралтын. Пайрем кок кугу лӱмгечылан: кумдан чапланыше поэт Валентин Христофоровичын шочмо Мызэҥер ялжылан 250 ий да Морко районлан 100 ий теммылан – пӧлеклалтын. Фестиваль-конкурсыш Марий Элысе тӱрлӧ район да ола, Татарстан Республик Арск район гыч йоча ден кугыеҥ-шамыч ушненыт. Нуно марий поэзийын шӱшпыкшӧ В.Х.Колумбын сылнымутшым марла, рушла, англичанла, финнла лудыныт.
– Фестиваль-конкурсышто сылнымутым шымлен шергалаш да сцене гыч калык деке намиен шукташ 78 участник кумылаҥын. Эн изи участник ныл ияш лийын гын, эн кугужо 60 ийым эртыше, – ойла Морко районысо клуб системе вуйлатышын инноваций да методике паша шотышто алмаштышыже Л.Ф.Кириллова. – Тенийысе таҥасымаш ойыртемалтше лийын. Колумбын сылнымутшо деч посна Морко районышто шочын-кушшо поэт-влакын почеламутыштым тунемшыжат, кугыеҥжат лудыныт але нунын мутыштлан возымо мурым йоҥгалтареныт. Тиде посна номинаций дене аклалтын. Конкурсышко ий гыч ийыш виян участник-влак ушнат. Тидыже куандара. Сылнымут – илыш вӱд. Кӧ тудым ик гана подылеш, ончыкыжым усталык корно дене пеҥгыдын, ӱшанлын ошкылаш тӱҥалеш.
Ийготым, тӱрлӧ номинацийым шотыш налын, сеҥыше-влакым палемденыт. Иктешлен ончалаш гын, кажне участник пӧлек дене палемдалтын. Сценыште шкем кучен моштымышт, артист койышышт дене поснак ойыртемалтше-шамыч таҥасымаште эре палдырнат. Икмынярыштым каласен кодем: Надя Сергеева (Морко, Шӱргыял), Елизавета Александрова (Йошкар-Ола, 55-ше номеран йочасад), Мария Николаева (Морко, Эҥерсола), Олеся Петрова (Морко, Коркатово), Александра Васильева (2-шо номеран Морко школ), Мария Цветникова (6-шо номеран Морко школ), София Сенькина (Морко, Октябрьский), Небогатиковмыт еш (У Торъял, Токтарсола), Даниил Романов (Волжский, Карай), С.В.Никитина (1-ше номеран Морко школын туныктышыжо), Гавриил Александров (Морко, Арын) да молат.
Чынжымак, южо икшывыже сценыште веле огыл, калык ончыко лекшаш черетшым вучышыжлат шинчалан вигак пернен. Шаршудо ӱмбалан верланыше да шке арвержым йырже поген шичше рвезым мыят шекланенам. Тиде Даниил Романов, Карай школын тунемшыже (снимкыште). Рвезе аваже Елена Вячеславовна да ачаже Сергей Германович дене пырля пайремышке толын. «Мый «Колумб лудмашке» ий еда ушнем. Ты таҥасымаш моткоч келша, – ойла Даниил. – Тыште конкуренций моткоч кугу. Йоча-влак почеламутым чот чаплын лудыт. Но нунын коклаште ойыртемалташ кӱлеш. Кок гана икымше верым сеҥен налынам (теният чылам ончылтен – автор). Мыланем В.Колумбын мыскара сынан почеламутшо-влак келшат. Ты гана «Шояк Павылым» лудам».
Фестиваль-конкурсышто Валентин Христофоровичын сылнымутшо торашке йоҥген. Ойыртемалтше йӱкан поэзийже кажнын кумылжым савырен, сылнын лудшо у лӱм-влак дене палдарен.
Л.ГРИГОРЬЕВА.
Авторын да И.РЕЧКИНЫН фотошт.
