«Возен мошташ Юмын, пӱртӱсын пуымо усталык кӱлеш», – ойлен МАССР-ын икымше калык поэтше М.Казаков. Шомакын юзо вийжым, моторлыкшым шижме мастарлыкым пӱртӱс Настя Михайловаланат пӧлеклен. Тудо Волжский район Кугу Корамас школышто 9-ше классым тунем пытарен.
– Изирак класслаште тунеммем годым «Юл увер» газетеш ава, кова, тӱрлӧ мероприятий, пайрем нерген заметкем-влак савыкталтыныт. «Шӱм-чон изолык» журнал дене кылым кученам. «Ямде лий» газет дене йолташ лийынам. 2017 ийыште мыйым «Марий юнкор» слётышко ӱжыныт. Уста еҥ-шамыч дене вашлиймаш-влак возаш утларак кумылым луктыныт. «Изи ур» икымше почеламутем лач ты слётышто шочын, – ойла ӱдыр.
Настялан сылнымутышко икымше ошкылым ышташ икымше туныктышыжо А.А.Семенова полшен. Кызыт марий йылмым да литературым туныктышо Г.И.Ибраева кумылаҥда. Сеҥымашышт ятыр. «Сылнымут алмаштыш», «Мый да шочмо йылмым туныктышем», «Моя марийская земля» республикысе сылнымут да сочинений конкурслаште сеҥышыш лектын. «Шулдыран мут» регион-влак кокласе сылнымут фестиваль-конкурсышто икымше лийын.
– Корамас кундемын южшак усталык шӱлышан. Тыште поэтессе Мардан Рая, журналист да мурызо Раисия Данилова, семмастар Иван Егоров, сӱретче Иван Ямбердов да молат шочын-кушкыныт. Мый нунын дене кугешнем да тыгаяк уста лийнем. Сылнымут дене умбакыжат кылым кучаш шонем. Тудо уш-акылым пойдара, Шочмо элым йӧраташ кумылаҥда, – ойла Настя.
