Йошкар-Оласе Йоча ден самырык-влакын усталык полатыштышт «Живая классика» всероссийский конкурсын регионысо этапше эртаралтын. Тушко Йошкар-Ола, Волжск ола да чыла гаяк район гыч 47 тунемше ушнен. Ӱдыр-рвезе-влак прозо гыч ужашым рушла да марла лудыныт. Нуным Марий Эл Республикысе образований да науко министрын алмаштышыже В.Г.Гаврилова саламлен.
Марий секцийыште Анна Прохорова (1-ше номеран Шернур школ, 10-шо кл.), Артемий Ендылетов (Марий Турек, Марий Купто, 7-ше кл.), Виктория Щербакова (Кужэҥер, Шӱдымарий, 7-ше кл.), Екатерина Мамаева (У Торъял, Тошто Торъял, 5-ше кл.), Антон Алексеев (1-ше номеран Морко школ, 10-шо кл.) (снимкыште ужыда), Наталья Ласточкина (Килемар, Арде, 8-ше кл.) таҥасеныт. Участник-влак Я.П.Майоров-Шкетанын, М.Рыбаковын, Ю.Артамоновын да моло авторын произведенийлашт гыч ужашым сылнын лудыныт. Нунын усталыкыштым Россий писатель ушемын йыжыҥъеҥышт Л.Иксанова, З.Тимофеева, Марий Эл Республикысе образованийын сулло пашаеҥже, филологий шанче кандидат, доцент Г.Бояринова акленыт.
– Тыгай конкурс йоча-влакым сылнымутлан кумылаҥда, нунын усталыкыштым почын пуаш, вияҥдаш полша. Марла лудшо-шамыч лывырге шочмо йылмышт дене ойыртемалтыт. Тиде кугешнымашым луктеш, – ойла Лидия Иксанова.
Сеҥышыш А.Алексеев, А.Прохорова, Е.Мамаева лектыныт. Нуным диплом дене палемденыт. Россий писатель ушемын Марий Элысе пӧлкажат сылнымутым йӧратыше йоча-влакым диплом дене куандарен. Организатор-шамыч вес гана марла лудшо-влакланат иктаж лагерьыште канаш путёвкым ойыраш тӱҥалыт манын ӱшанена.
Ончыкыжым «Живая классика» конкурсышто марла лудшо-шамыч утларак лийыт шонена. Тыгай таҥасымашыш кажне районысо школ ушна гын, сылнымутын толкынжат чотрак вияҥеш.
Прозо гыч ужашым рушла лудмаште Екатерина Запевалова (Звенигово, 2-шо номеран Красногорский школ), Вячеслав Михайлов (Йошкар-Оласе 27-ше номеран школ), Мария Торощина (Йошкар-Оласе Т.В.Иштрикова лӱмеш «Синяя птица» гимназий) ойыртемалтыныт. Сеҥыше-влак май тылзыште «Артек» тӱнямбал йоча рӱдерыште конкурсын финалыштыже Марий Элын чапшым аралаш тӱҥалыт. Нунылан ӱшанена да сеҥымашым тыланена!
З.ТИМОФЕЕВА.
Авторын фотожо.
