«Ямде лий» газетым арня еда куанен вучышо, тӱҥалтыш гыч мучаш марте лудшо-влак кажне юнкорын лӱмжым шарнен кодыныт, шонем. Кажныж дене палыме лиймыштат шуэш, очыни. Почеламутым возышо-шамыч кокла гыч Диана Тойбахтина (снимкыште) ойыртемалтеш. Таче тудо лаштыкнан унаже.
Диана У Торъял район Тошто Торъял школышто 9-ше классыште тунемеш. Марий йылмылан, сылнымутлан изинек шӱман.
– Почеламутым возаш тӱҥалтыш класслаште туныктышем Алевтина Вениаминовна Ершова кумылаҥден. Туныктышын кечыже вашеш «Икымше туныктышем» почеламутым серенам. Мастарлыкем вияҥдаш манын, тӱрлӧ авторын поэзий книгажым лудам. Могай образым кучылтмыштым, рифме-шамычым шымлем. Кумылем нӧлташ пӱртӱс лоҥгашке лектам, шочмо веремын моторлыкшым эскерем. Мӧҥгӧ толамат, почеламут писын возалтеш, – ойла ӱдыр.
Диана усталыкшым тӱрлӧ кӱкшытан конкурсышто ончыкта. Сеҥымашыжат уло. Школышто эртаралтше «Йылме пеледышым пого – тудо вет ӱмырыштет» сылнымут конкурсышто чыланыштым ончылтен. «С.Г.Чавайным моктен мура Марий кундем!» республикысе конкурсышто сеҥен.
– Мый тыгак почеламутым, ойлымаш, повесть, роман гыч ужашым сылнын лудаш йӧратем. Тунам сылнымутын вийжым, кажне шомакын моторлыкшым утларак шижат. «Живая классика» всероссийский конкурсын районысо йыжыҥыштыже икымше верым сеҥен налынам. «Живое наследие» районысо конкурс-фестивальыште кумшо лийынам. Районышто эртаралтше «Данилов лудмаште» мастарлыкем ончыктенам, – палдара Диана.
Чолга марий ӱдыр деч шуко сылне почеламутым вучаш тӱҥалына.
Христина АЛЕКСАНДРОВА.
Фотом еш архив гыч налме.
