Ешыште шочшым воспитатлымаште тӱрлӧ проблеме лектеш. Мутлан, икшыве яра жапым пайдалын кучылтшо манын, ача-ава-влак тудым кузе кумылаҥдышаш улыт? Йоча шукыж годым телефон дене модын шинча. Тиддеч кузе кораҥаш?
Йодыш-влаклан Йошкар-Олаште «ГороДетей» тунемме рӱдерын психолог-логопедше, Россий Федерацийын общий образованийжын почётан пашаеҥже Е.М.Паскаль тыгерак вашешта:
– Икшыве яра жапшым пайдалын кучылтшо манын, тудым изинек туныктыман. Шочшын койышыжо, уш-акылже, тыршымашыже, жапым аклен моштымыжо еш гыч тӱҥалеш. Ешыште могай шӱлыш озалана, тугай йоча кушкеш. Садлан икте-весым пагален да келшен илыман, икшывымат тидлан туныктыман, жапыштыже тудлан полшен шогыман. Ешартыш занятийлаште уш-акылым, мастарлыкым вияҥдаш кумылаҥдыман. Музыкальный але кидпаша кружокыш кошташ, спорт дене кылым кучаш таратыман. Кертме семын ойым, ӱшаным пуаш тыршыман. Шукырак моктыман, сеҥымашыжлан ӱшаныман. Кӱлеш годым уто койышым тӧрлатен шогыман, умылен моштыман да чын лияш туныктыман. Тыгак икшывын шонымашыжым, йодмыжым шотыш налын, тудын дене пырля каныш кечым эртараш йӧным муман.
Йоча моштымо пашажым шке ыштышаш. Огеш керт гын, полшыман, но тӱрыс ыштен пуыман огыл.
Тыгай сӱретат вашлиялтеш: икшыве тӱрлӧ йодыш дене ынже йыгыжтаре, воктене мешаен ынже кошт манын, ача-ава-влак тудым телевизорым ончаш поктен колтат але телефоным кучыктат. Йочам пашам пырля ышташ огыт ушо. Икшыве ача-авалан огеш полшо гын, кунам тудо пашалан тунемеш? Садлан тудым изиж годымак кугуракым пагалаш, изиракым чаманаш да пашам йӧраташ туныктен куштыман. А йочалан яра жапым пайдалын кучылт моштымаш – тиде пеш кугу паша. Шочшо ача-авам ончен илаш тунемеш.
