Мария Бирюкова – Волжский район Кугу Корамас школын тунемшыже. Мураш, почеламутым сылнын лудаш кумылан. Мастарлыкшым школышто эртаралтше тӱрлӧ мероприятий ден конкурсышто ончыкта.
– Республикысе конкурсышко икымше гана ушненам, – ойла Мария. – Тудо Морко район Арын школышто эртаралтын. Йоча поэт Василий Крыловым шарныме лӱмеш поэзий, муро да сӱрет конкурсышто почеламутым лудынам, мурым муренам. Моткоч келшен.
Мария «Театр» почеламутым лудмыж дене шке ийготан-влак коклаште сеҥышыш лектын. «Муро» таҥасыштат икымше лийын. Шочмо йылмым, сылнымутым йӧраташ класс вуйлатышыже Л.А.Михайлова кумылаҥда.
Е.ИВАНОВА.
