Чебоксар олаште «Успешная семья Приволжья – 2023» конкурсын финалже эртаралтын. Юл кундем федерал округын тӱрлӧ регионжо гыч 14 еш мастарлыкшым ончыктен. Нуно пиалан еш илышын секретше дене палдареныт, шочмо кундемышт нерген каласкаленыт. Марий Элын чапшым Йошкар-Ола гыч индеш йочан Соловьёвмыт еш (снимкыште) арален да «Крепкая семья» таҥасыште сеҥышыш лектын.
– Конкурсыш шуко шочшым ашнаш налше еш-влак ушненыт. Моло дене таҥастарымаште мемнан ешна изиракын чучын, но чолгалыкнам, усталыкнам кугешнен ончыкташ пиал лийын. Конкурс моткоч сай шарнымашым коден. Йоча-шамыч тӱрлӧ модыш дене модыныт, мастер-классыш ушненыт. Ме, ача-ава-влак, икте-весе дене лишкырак палыме лийын, вашкылым пеҥгыдемденна, – ойла шуко шочшан ава Ирина Геннадьевна Соловьёва.
Е.ИВАНОВА ямдылен.
