Кажне сурт – тиде историй, ойыртемалтше пӱрымаш, илыш. Мый Йошкар-Олаште Чернышевский уремысе 23-шо номеран тошто пӧртын эртыме корныжым пален налынам. Кызыт тушто Калык арвер да сымыктыш тоштер верланен.
Ожно ты пӧртыштӧ поян П.Д.Лоханов ешыж дене илен. Павел Дмитриевич Царевококшайск оласе земский управыште корным чоҥышо подрядчиклан шотлалтын. Шымлыме пашам эртарыме годым весат рашемын: улан еҥын Семёновка селаште мӱкшотарже, садше да пӱяже лийыныт. Ик пачашан пу пӧртым 1900 ийыште чоҥымо. 1918 ийыште Совет власть тудым Лохановмыт деч поген налын. 1920-1940 ийлаште тушто ремесленный школ, йоча-влаклан кочмывер да молат верланеныт.
Кызыт П.Д.Лохановын пӧртшӧ Марий Элын историко-архитектурный памятникшылан шотлалтеш.
Даша ТИХОНОВА.
Семёновка селасе 21-ше номеран школ.
