6-шо номеран Морко школышто краеведенийлан кугу тӱткышым ойырат. Н.А.Михайлован вуйлатымыж почеш краеведений кружок 2002 ий гыч пашам ышта.
– Эн ондак тунемше-влакын сарыште кредалше да вуйыштым пыштыше родо-тукымышт нерген уверым кычалынна. Вара землякна-влакын илыш корныштым шымлаш тӱҥалынна, – ойла Надежда Александровна. – Ӱдыр-рвезе-шамыч дене архивышке, книгагудышко, тоштерышке коштына. Газет ден журнал-шамычым, документым шергалына (снимкыште).
Йоча-влак шымлымаш пашашт дене конкурс ден конференцийлашке ушнат. 1-ше номеран Морко школын эртарыме «Лаврентьев лудмаш» конференцийыште вийыштым тергат. Кум ий почела сеҥыше радамыште лийыныт. «Шаг в будущее» районысо конкурсышто ӱмаштат, теният 1-ше верым налыныт. Йоча да самырык-влаклан «Роза ветров» рӱдерын эртарыме «Край родной марийский» республикысе краеведений паша конкурсышто ойыртемалтыныт. «Мыйын еш архивем» конкурсышто кажне гана ончылно улыт.
– Кружокышто йоча-влак шочмо калыкым пагалаш, шочмо кундемым йӧраташ тунемыт. А краеведений шанче пашашке корным почеш, – ойла Н.А.Михайлова.
