Медведево посёлкысо 3-шо номеран школын 3-шо классыштыже тунемше Дима РЫБАКОВ – тале шахматист.
– Диман медаль ден кубокшым вераҥдылаш пӧртыштӧ верат ок сите, – шыргыжеш рвезын ачаже Владимир Геннадьевич. – Ныл ияшыже годым полкышто шогышо шахмат фигурым ужмеке ончыкташ йодын. Шахматист омыл гынат, фигурла дене кузе кошташ лиймым умылтаренам да пырля модынна. Икмыняр жап гыч Дима мыйым сеҥаш тўҥалын, модаш утларак кумылаҥын. Усталыкшым вияҥдаш шонен, шахмат кружокыш колтенам. Туныктышо Наталья Анатольевна Дегтяревалан кугу таум ойлем.
Изи рвезын тыршымыже арам лийын огыл. Озаҥ, Челябинск, Кострома, Саратов, Нижний Новгород, Владимир да моло олаласе таҥасымашлаште сеҥышыш лектын. Удмурт Республикысе Дебёсы селаште эртаралтше писе шахмат дене Всероссийский ялысе модмаште 11 ияш марте ийготан-влак коклаште икымше верыш лектын.
– Шахмат дене модмаш шонаш туныкта. Тунеммаште полша. Математике дене 5-ше класслан темлыме задачым, примерым нелылык деч посна шотлем. Умбакыжат шахмат дене кылым кучынем. Турнирлаште сеҥаш шонем, – ойла Дима.
