2021 ий мучашке лишемеш. Кажне еҥ идалыкым иктешла. И.С.Палантай лӱмеш тӱвыра да сымыктыш колледжын Национальный сымыктыш гимназийыштыже марий йылмым да литературым туныктышо Э.В.Петрован паша лектышыже куандарыше лийын.
– Тиде идалык ятыр куаным пӧлеклен. Ий тӱҥалтыште Москошто эртаралтше Педагогический мастарлык форумлан кыртмен ямдылалтынам. Лектыш уда огыл: кумшо вер дене палемденыт. Кеч-могай сеҥымаш умбакыже пашам утларак виян ышташ кумылым луктеш.
– Эльвира Владимировна, тунемшыда-влакат сеҥымашышт дене куандарат.
– Идалык мучаште «Марла чын возена» диктантышке ушненна. Тушто шкежат сеҥыше радамыш логалынам. Эн куандарышыже – вуйлатыме классыштем шинчымашым погышо Лена Семёнован тунемше-влак коклаште сеҥымашыже. ™дыр-рвезе-шамыч телевиденийыште, радиошто йоча передачылам вӱдышӧ семын тыршат, театрыште мастарлыкыштым ончыктат. Тиде огыл мо туныктышын чонжым куандара?
– У ийлан у шонымаш-влак ямде улыт, очыни?
– Тазалык лиеш гын, пашам ышташ, кӱкшытыш шуаш кумыл лектеш. У ийыш у пиал, у шонымаш дене вончем. Вуйлатыме классем вес ийын школ дене чеверласа. Ончылно – экзамен-влак, кумда корныш лекташ ямдылалтмаш. «Ямде лий» газетым лудшо-влак, таза лийза, ончыко ӱшан дене ошкылза, тунеммаште але пашаште сай лектыш лийже.
