«Марий калыкын чотшо шагалемын», – маныт. Мый тиде ой дене тӱрыснекшак ом келше. Калыкнаже уло. Лач ятырже марий улам манаш ала-молан ӧреш», – ойла Виче кундем Вӱрзым район Буйское селаште шочын-кушшо, кызыт Шернур посёлкышто илыше чолга рвезе Дмитрий Капитонов.
Виче кундемыштат марий-влак тукымыштым шуят. Нунын кокла гыч иктыже – Капитоновмыт. Усталык шӱлыш, марий койыш, калыкым йӧратымаш да пагалымаш ты ешыште тукым гыч тукымыш куснат. Кызыт ты сомыл – Дмитрий да тудын акаже Нина Николаевна Теплых ӱмбалне. Ончыч ака-шольо верысе тӱвыра пӧртыштӧ выступатленыт. Умбакыже «Марий муро» ансамбльыш ушненыт. Шукерте огыл «Тукым кыл» ансамбльым (снимкыште) чумыреныт. Идалык наре жапыште районысо веле огыл, ятыр всероссийский конкурсышто сеҥыше радамыш лектыныт. Дмитрий Капитоновын тукым шӱжарже Даша Теплыхат пырляшке кумылын ушнен.
– Даша марла кушташ, мураш ок вожыл. Марий улмыж дене кугешна. Тудын чолгалыкшым
ужын, йолташ ӱдыржӧ-влак пырляш ушнаш кумылаҥыныт, – палдара Дмитрий. – Мемнан ача-авана уста лийыныт. Кажне пайремым мурымаш-куштымаш, гармонь сем дене сӧрастареныт. Меат сценыште выступатлаш йӧратена. Кумшо тукымым шуйышо Даша ынде мемнан корным тошка. Ансамбльлан лӱмым пуымаште тидым шотыш налме.
«Тукым кыл» ансамбль выступатлымыж годым XIX курымысо сӱан вургемым, кажне кечын чиен коштмо тошто тувырым, ший сӧрастарышым калык ончыко луктеш. Тидым Дмитрий Николаевич шкеак чумырен.
– Мыланем шочмо кундемым шымлаш келша. Садлан яллаш лектын коштынам, кугыеҥ-шамыч деч ятыр йодыштынам. Эркын марий тувыр-влакым погенам. Ончыч верысе тӱвыра пӧртыштӧ ончерым келыштаренам. Вараже вес калыкланат тудым ончыкташ пиал шыргыжалын. Поснак йоча-шамычлан оҥай. Тидыже куандара, – ойла чолга рвезе.
Марий-влак элнан тӱрлӧ кундемыштыже илат. Нуно чолга, уста, виян улыт. Мемнан тӱвырана поян. Садлан шке калык нерген палдарыман, марий улмына дене кугешныман.
Оля МАЙКОВА.
Фотом еш архив гыч налме.
