«Ямде лий» газетын кызытсе да ончычсо юнкоржо-влак эн чолга, эн уста улыт. Тыгай еҥже-шамычым ынде шотлен от пытаре! Кажне районышто, кажне олаште, эсогыл вес элыштат улыт. Нунын кокла гыч иктыже – Параньга район Усола ялын шочшыжо Анфиса Усолова (Пектубаева). Чолга ӱдыр дене вашлийын мутланышна.
– Анфиса, «Ямде лий» газет шуко еҥлан сылнымутышко икымше ошкылым ышташ полшен. Тыланетат, очыни.
– Усола школышто тунем-ме пагытым кампетке гай тутло жаплан шотлем. Туныктышына-влак мемнам тӱрлӧ могырым вияҥденыт. Мый юнкор кружокыш куанен коштынам. Тудым Татьяна Геннадьевна Афанасьева вуйлатен. Туныктышына «Ямде лий» газет дене кылым кучаш кумылаҥден. Икымше почеламутем шошылан пӧлеклалтше лийын. Кугурак класслаште марий йылмым да литературым туныктышо Надежда Степанова Очеева шочмо йылмын ямжым шижаш полшен. Туныктышем-влаклан кӧра возымо пашам-шамыч «Ямде лий» газетыште савыкталтыныт. Шке лӱмым республикысе газетыште ужмеке, чонемым куаныме, кугешныме, тургыжланыме кумыл авалтен. Вара Аня шӱжаремымат возкалаш кумылаҥденам.
– «Ямде лий» газетышке чолган возен шогыметлан тыйым «Марий юнкор» слётышко ӱжыныт. Айда тиде пагытыш пӧртылына.
– Тиде 2011 ийыште лийын. Слёт Йошкар-Олаште эртаралтын. Тунам 9-ше классыште тунемынам. Мыланем экзаменым кучаш кӱлын, садлан тургыжланенам. Туге гынат слётыш ушненам. Ме почеламутым, заметкым, ойлымашым, йомакым чын возаш тунемынна. Уста еҥ-влак дене вашлийын мутланенна. Тӱрлӧ вере миен коштынна. Ятыр у йолташым муынам. Южышт дене кызытат кылым кучена.
– Тый сылнымут пашатым умбакыже шует. Поэзиет молын деч ойыртемалтеш. Палдаре, мо дене?
– Мый Юл кундемысе кугыжаныш технологий университетым «Социальный паша» направлений дене тунем пытаренам. Диплом пашам тулыкеш кодшо йоча-влак дене кылдалтше лийын. Йошкар-Олаште Калыкым социально обслуживатлыше комплексный рӱдерышке пашаш пурымеке, коча-кова-влакым компьютерым кучылташ туныктенам, начар тазалыкан самырык еҥ-шамыч дене кылым кученам. Почеламутлаштем йоча ден ава кокласе кыл, тулык икшыве нерген йодыш-влак кугу верым айлат. Нуно чоным корштарат.
– Анфиса, сылнымут пашат ончыкыжымат вораныже, лудшо-влакым куандаре.
