Совет Ушем Герой Василий Соловьёвым шукын палат. Тудо Кугу Ачамланде сарыште Шочмо эл верч шкем чаманыде кредалын. Смоленск областьысе Духовщинский районысо Жуково села воктенысе тале кредалмаш годым оҥжо дене фашистын амбразуржым петырен. Кажне еҥ тыгай подвигым ыштен кертеш мо? Уке, очыни. Тидлан изинек пеҥгыде капкылан, таза кушман, спортым йӧратыман, лӱддымӧ лийман. Морко район Муналмаш ял гыч Сева, Радамир, Аделина, Марат Соловьёвмыт Геройын фамилийжым нумалмышт дене кугешнат да лач тыгаяк шонымашан улыт.
Соловьёвмытым спорт таҥасымаште чӱчкыдын ужаш лиеш. Волжский район Ӱлыл Азъял воктене эртаралтше курыкысо куржталмашкат ушненыт.
– Ме ешыштына чыланат спорт дене пеҥгыде кылым кучена. Ачана школышто тунеммыж годым тале спортсмен лийын. Тукым иза-ака-влакат тӱрлӧ таҥасымаште эре ончылно улыт. Нунын деч вараш ынена код. Радамир вич ияш веле гынат, ик меҥгым куржталмаште эркын-эркын шкенжым сеҥаш тунемеш. Меат тыгак кушкынна. Ме Шочмо элнан ончыкылык аралышыже улына. Садлан рвезе-влаклан патырлык да лӱддымылык дене поснак ойыртемалтман, – ойла Марат.
Сева, Аделина, Радамир спорт дене кылым кучаш тӱҥалыныт веле гын, изашт тӱрлӧ кӱкшытан таҥасымаште вийжым терген. Ижевск, Ульяновск, Киров олалаште лийын. Республикыште эртаралтше таҥасымашлаштат сеҥымашыже ятыр. Тыгак ече дене кошташ кумылан. Олимпийский чемпион Александр Большунов гай тале спортсмен лийнеже. Шольо-шӱжарже-влакымат кугу сеҥымашке шуаш тарата.
