Параньга район Матародо школышто кокымшо классым А.В.Морозова туныкта. Чылаже – 17 йоча. Марий чонан туныктышын тунемшыже-влакат марий шӱлышан кушкыт: чылан марла кутырат, марла мураш-кушташ йӧратат. Кажне йоча «Ямде лий» газетым налеш.
– Алёна Вячеславовна, йоча-влакым марий йылме деке шӱмаҥдаш могай йӧным кучылтыда?
– Школышто марий йылмым шочмо йылме семын тунемына. Моло уроклаште темым рушла умылтарем гынат, марий йылме да литератур уроклаште литературно чын кутыраш тыршена. Шочмо йылмым пагалымаш да йӧратымаш ача-ава деч тӱҥалеш. Мӧҥгыштӧ шочмо йылмын сылнылыкше, тудын вийже нерген каласкалышаш улыт. Уроклаште йылме лывыртыме пашам ышташ «Ямде лий» газет ден «Кече» журналым кучылтына.
– Палем, физкультур урокыштат марий модыш дене модыктеда. Лудшына-влакым иктыж дене палдарыза.
– Модыш «Мундыраш чумыргена» маналтеш. Йоча-влак йыр чумырген шинчыт. Икымше модшо мундыра гыч парняшкыже шӱртым пӱтыра, вара мундырам воктен шинчышыжлан пуа. Тунамак иктаж-мо нерген йодеш. Мутлан: «Тый могай марий кочкышым палет?» Кокымшо йоча вашешта да парняж йыр шӱртым пӱтырал кода. Пош-кудыжлан йодышым ямдыла. Тыге пытартыш модшо марте. Йоча-влак илыше мундыраш савырнат. Ӱдыр-рвезе-влак перемен годымат модаш йӧратат.
– Тачысе йочан койышыштыжо могай ойыртемым ужыда?
– Тачысе йоча – мемнан ончыкылыкна. Сандене нуным кызытсе илышлан келшышын туныктыман, у йӧн-влак дене пайдаланаш таратыман. Икшыве-влак илыш дене тӧр ошкылыт, шуко палат. Огыт вожыл. Шонымашыштым раш ойлен моштат.
