Икте-весылан полшен моштымым ожнысек акленыт. Кызыт ты койыш поснак кӱлешан. Школлаште тунемше-шамычат поро пашашке ушнат. Специальный сарзе операцийыште улшо салтак-влаклан тӱрлӧ сынан полышым ыштат. Теве Советский посёлкысо 3-шо номеран кыдалаш школышто тунемше-ша¬мыч яра жапыштышт шӱр наборым ямдылат. Ты сомылым директорын воспитаний паша шо¬тышто алмаштышыже Н.Н.Обухова вуйлата. Нурия Николаевнан аваже Таслия Икрамовна 7-ше «А» классыште тунемше юнармеец-влаклан мастер-классым эртарен.
– Йоча-влак мӧҥгышт гыч пакчасаскам, шылым шолтен кондат. Вара ме авамын пӧртыштыжӧ погынена. Чыла пӱчкедена да коштена. Ямде кочкышым пайлен оптена. Тыгак йоча-шамыч серышыштым да открыткыштым пыштат. Ӱшанена: изи пашана кугу полышым пуа, – ойла Нурия Николаевна.
Шукерте огыл тунемше-влак пастила ден емыж чипсым ышташ тунемыныт. Нине тутло кочкышат салтак-шамычым куандараш тӱҥалыт.
Е.СЕРГЕЕВА мутланен.
Фотом школ архив гыч налме.
