Коҥга – пӧртын чонжо. Тудо шокшым пуышо, суртым аралыше.Коҥга нерген шуко калыкмутым, поро шомакым 12 февральыште Кужеҥер районышто колаш лийын. Тушто «Коҥга пайрем» районысо фестиваль тений кандашымше гана эртаралтын. Шернур районысо фольклор коллектив-влак да тыгак вес районла гыч толшо уна-влак весела куштымаш, калык муро, йӱла-влак дене калыкым куандареныт. Шӱдымарий школ пеленсе фольклор ансамбльыш коштшо ӱдыр-рвезе-влакым районысо мероприятийлаште чӱчкыдын ужаш лиеш. Ты пайремат нунын деч посна эртаралтын огыл. Изи артист-влак марий йӱла нерген «Шинчымаш кас» сценкым модыныт.
– Ме кажне йӱлам тунемына. Калык мурым мурена, куштена, тыгак сценке-влакым шындена. Шочмо йылмым, йӱлам арален кодымо шонымаш дене ты ансамбльым чумырымо. Йоча-влак чыланат марла кутырат, ансамбльыш куанен коштыт, – ойла вуйлатыше И.Н.Горинова.
