Ожно ик ялыште шӱдӧ еҥан еш илен. Тушто ны вурседылмаш, ны кучедалмаш нигунам лийын огытыл. Тидын нерген увер Он деке миен шуын. Он, ты ялыш толмеке, йырым-йыр арулыкым, ласкан кутырымым, келшен, умылен, пырля пашам ыштен илымым ужын, моткоч ӧрын. Тунам тудо суртоза деч еш илышын секретшым йодын. Илалше суртоза чытырыше кидше дене кужу жап возен. Он кум мутым умылен: «Йӧратымаш, умылымаш, чытымаш». «Шӱдӧ гана йӧраташ, шӱдӧ гана умылаш, шӱдӧ гана чыташ», – мучаште палемдыме лийын. Он моткоч ӧрын. «Тиде еш илышын да тынысын негызше», – ешарен илалше суртоза.
Марий йӱлам жаплат
Башкортостан Республик Мишкан районысо Тынбай ялыште илыше Абдулинмыт еш дене палыме лиймеке, нуно еш илышын секретшым раш палыше улыт, шоналтышым. Галина Валериевна ден Валентин Виляминович эн кугу пиаллан икшывым да ешыште умылымашым шотлат. Ушнымыштлан латиндеш ий темеш. Кум шочшышт уло. Дин лӱман эргым ашнаш налыныт да йол ӱмбак шогалтеныт. Тудо кызыт посна лектын. Г.В.Абдулина ял шотан илемыште специалистлан па-шам ышта. Пелашыже Йӱдвелыш вахте дене коштеш. Нуно марий пайрем йӱлам жаплен илат. Сурт озанлыкым кучат, ятыр вольыкым ашнат.
– Ялыште илышын вӱта тич вольык, пакчасаска лыҥ лийшаш. Тыге умылтарен, пашалан туныктен, мемнам йоча годсек куштеныт, – ойла суртоза В.В.Абдулин. – Мландына уло. Пашам куштылемдаш манын, техникым шке наледыме. Кеч-могай пашам ик ой дене ыштена.
Ачан тӱҥ полышкалышыже Денис гын, Яна ден Даяна авашт пелен кухньышто утларак жапым эртарат. Абдулинмытын йӧратыме кочкышышт – подкогыльо. Галина Валериевна руашым нӧштылеш, ӱдыр-влак тӱрлат. Тутло сий ӱстелтӧрыш ешым чумыра. Теле кастене кидпаша чоным ырыкта. Г.В.Абдулина икшыве-влакым марий калыкын тӱвыраже, йӱлаж дене палдара. Тудын кидыште тыглай шӱртӧ гыч тӱрлӧ арвер шочеш. Родо-тукымжым пижергым, носким пидын чикта. Чевер мулине гыч марий тӱр марий вургемым сӧрастара.
Кум йоча – кум тӱрлӧ
Икшыве-влак ава гай чолга, ача гай чулым улыт. Кугурак ӱдырышт – Яна – Тынбай школын 11-ше классыштыже тунемеш. Школышто кугурак классласе ушемын вуйлатышыже, баскетбол дене «Атлет» школ командын капитанже, «Отряд добрых дел» волонтёр отрядын активистше. 2021 ийыште «Саскавий» регионысо конкурсышто кумшо верым налын. Ончыкылык илышыжым медицине дене кылдынеже. Даяна ты школын 9-ше классыштыже тунемеш. Тудо, очыни, артистке лиеш. Тынбай клуб пеленысе «Рвезылык» ансамбльыш коштеш. Тӱрлӧ сценкыште, спектакльыште тӱҥ рольым Даяналан ӱшанат. «Илыше классике» конкурсышто кажне ийын сеҥышыш лектеш. 7-ше классыште тунемше Денис кок акаж дечат мастарлыкым чинче семын пога. Ече дене изинек коштеш. Мини-футболла талын модеш. А тавалтен колта гын, пурак веле тӱргалтеш. Денис – «Шонанпыл» ансамбльын чолга участникше.
– Йоча-влакын изиракышт годым еш команде дене тӱрлӧ спорт таҥасымашке ушненна. Кызытат эҥертышышт лияш тыршена. Мемнан полыш киднам шочшына-влак эре ши-жышт манын тыршена, – ойла Галина Валериевна.
Еш – эн шерге пиал. Йоча-влаклан – шокшо помыш, чон пыжаш, ача-авалан – ласкалык, куан. Тек кажне суртышто йӧратымаш, умылымаш, порылык озаланат.
