Географий дене всероссийский олимпиадыште Российын 65 субъектше гыч 263 тунемше уш-акылжым терген. 3-шо номеран Советский школын 11-ше классыштыже тунем-ше Алексей Виногоров (снимкыште) Марий Элын чапшым арален да сеҥыше радамыш лектын.
– Ача-авамын тӱнямбалсе политике картым да атласым налмекышт, географийлан шӱмаҥынам. 5-ше класслан мый чыла элым, нунын рӱдолаштым, флагыштым, кугурак эҥер-влакын лӱмыштым паленам. Географий дене икымше туныктышем Татьяна Павловна Домрачевалан кугу таум ойлем. Йошкар-Оласе А.С.Пушкин лӱмеш 4-ше номеран гимназийыште географийым туныктышо Андрей Александрович Столяров кызыт мыланем келге шинчымашым пуа, – ойла рвезе.
Алексей Москосо М.В.Ломоносов лӱмеш кугыжаныш университетысе географий факультетыш тунемаш пураш шона.
Карт ден атлас полшеныт
