Туныктышо-влак коклаште педагогике мастарлык республиканский конкурс 20-23 апрельыште Советский посёлкысо 3-шо номеран школышто эртаралтын. Таҥасымашке 39 воспитатель да туныктышо ушненыт. Алексеевский, Ӱшнӱр школлаште, Советский посёлкысо 1-ше №-ан «Йомак» йочасадыште ты кечылаште паша шолын. Туныктышо-влак семинарым, урокым, мастер-классым эртареныт, проектым араленыт. «Йыргешке ӱстел» молгунамсе деч ойыртемалтше лийын. Финалыш лекше туныктышо-влак кодшо ийын тыгаяк конкурсышто сеҥыше-влак дене вашлийын мутланеныт.
«Идалыкын туныктышыжо – 2021» лӱмым Елена Николаевна Романова сулен налын. Тудо Медведево районысо Краснооктябрьский школышто тӱҥалтыш класслам туныкта.
«Уста марий туныктышо – 2021» таҥасыште 8 педагог мастарлыкшым ончыктен. 2-шо номеран Морко школын туныктышыжо Надежда Александровна Голубкина сеҥышыш лектын.
Волжск оласе 17-ше №-ан «Дюймовочка» йочасадын туныктышо-логопедше Юлия Анатольевна Белоусова «Идалыкын воспитательже – 2021» таҥасыште сеҥыше лийын.
