Уста ешыште шочмеке, кузе чолга от лий? Республикыштына Кужэҥер район гыч Милютинмыт ешым чыланат палат, манаш лиеш. Евгений «Марий Эл» кугыжаныш куштышо ансамбльыште кушта. Мария Марий Эл Республикысе калык усталык да культурканыш паша шотышто шанче-методике рӱдерыште пашам ышта. Татьяна Новочебоксарск олаште «Горница» руш муро калык ансамбльым вуйлата. Эн изи шольышт, Александр, иза-ака-влак деч вараш ок код. Шорсола школышто 7-ше классым тунем пытарен. Чолгалыкшым тӱрлӧ конкурсышто терга, Йошкар-Оласе «Воштончыш» образцовый музыкально-драматический театрыш коштеш.
– Почеламутым сылнын да чын лудаш авам да марий йылмым туныктышо кумылаҥденыт. Йочасадыштак ятыр произведенийым наизусть паленам. Рушлат, марлат лудаш келша. Но марла возымыжо чонымак ырыкта. Яков Майоров-Шкетанын сылнымутшо поснак ойыртемалтеш. Руш поэт кокла гыч Владимир Маяковскийым ойырем, – ойла Саша.
Чолга рвезын почеламутым лудмыж деч посна школысо ик мероприятий ок эртаралт. Шочмо сцене калык коклашке лекташ йӧным ыштен. Саша ятыр конкурсышто сеҥен. «Илыше классике» республикысе конкурсышто ойыртемалтын. Сыктывкар олаште эртаралтше «Венок дружбы» регион-влак коласе йоча фестиваль-конкурсышто Гран-прим сеҥен налын.
– Кидым волташ ок кӱл. Еҥым колыштде, ончыко у сеҥымаш деке ошкылман. Кугу шонымашем шукталтеш манын ӱшанем! – ойла Саша.
