Кугу Ачамланде сарыште Сеҥымашлан 80 ий теммылан пӧлеклалтше ятыр мероприятий школышто эртаралтеш. Школ тоштерыштат лийынна. Тушто аралалтше «Они защищали Родину» книган «Тумьюмучашское поселение. Село Тумьюмучаш» ужашыже поснак шарналт кодын. Лаштыклымеке, кугезе кочамын, Михаил Демидович Булыгинын, лӱмжым шекланенам. Илыш корныжым кумданрак шымлаш кумылаҥынам.
Михаил Демидович (снимкыште) 1926 ий 2 январьыште Советский район Шуймучаш ялеш шочын. Кандашияш Кукмарий школышто тунемын. 1943 ийыште 17 ияш рвезым Совет Армий радамыш налыныт. 1943 ий ноябрь гыч 1944 ий май марте миномётчик лийын. Вара 143-шо стрелковый полкыш станковый пулемётчиклан кусареныт. 1944 ий 4 августышто тушманын пуляже пурла вачыжым шӱтен. 1945 ий февраль марте госпитальыште эмлалтын. Вара мӧҥгыжӧ пӧртылын. Сеҥымашым шочмо кундемыштыже вашлийын.
Сар жапыште уло Белоруссийым эртен, Прибалтикым утарымаште лийын. Патырлыкым ончыктымыжлан I степенян Кугу Ачамланде сар орден, «За победу над Германией» медаль дене палемдалтын.
1947 ийыште кугезе кочам Мария Ивановна Веденькина дене ешым чумырен. Но кугезе ковамын ӱмыржӧ кӱчык лийын. Михаил Демидович вич йочам шкет йол ӱмбак шогалтен. 1970 ийыште кокымшо гана мужыраҥын. Валерий эргышт шочын. Кызыт Валерий чӱчӱэмын Дмитрий эргыже – СВО-што.
1987 ийыште кугезе кочамын илышыже кӱрылтын. Мый тудын дене кугешнем. Шымлыме пашам еш архивыш аралаш кодем.
Лена ИВАНОВА.
Кужэҥер, Коҥганур.
Фотом еш архив гыч налме.
