Кужэҥер район Йывансолаште илыше Елена Анатольевна ден Андрей Альбертович Яндемировмыт 4 шочшан пиалан ача-ава улыт (снимкыште). Нуно кажне татыште чон гыч памашла шолын лекше йӧратымашыштым икшывыштлан пӧлеклат. Вет икшыве – илышын ыҥже. Мужыр пелаш шкештат шуко икшыван ешыште шочын-кушкыныт. Ушнымекышт вигак пеҥгыдын шонен пыштеныт: шуко шочшан лияш. Кызыт нуным кок эргышт да кок ӱдырышт куандарат.
Елена Анатольевна ден Андрей Альбертович ялыште шочын-кушкыныт. Изиненак пашалан шӱман улыт. Кызыт Андрей верысе ялозанлыкыште чоҥымаште тырша, Елена пелашыже – кевытче. Самырык мужырым нимогай паша огеш лӱдыктӧ. «Ялыште мыланна куштылго, чонна кана», – ойлат нуно.
– Кызыт шуко самырык еҥ олашке каяш тырша. Мыланна гын, ялыште илаш моткоч келша. Чын, паша шуко, но тудым рӱжге, тӱшкан ыштет гын, нимогай нелылык огеш шижалт. Кызыт ялыште вольыкымат шагалын ашнат. Мемнан гын ушкал, ӱшкыж, сӧсна да чыве уло. Кажне ийын шудым ямдылена. Ача-аванат полшат. Пакчагӧргӧ чыла шкенан. Тудым шындаш, ончен, кушташ, поген налаш полшаш икшывына-влак кушкын шуыныт. Ик жапыште олаш илаш каяш шонымаш лийын, но трукышто тудо ала-кушко йомо. Ме пелашем дене ялыште илен тунемше улына. Пашам ышташ йӧратена. Ола чылт мемнан огыл. А теве йочана-влак гын олаш кайынешт. Кӧ пала, ала иктаж-кунам меат икшывына-влакын шонымашышт дене келшена да олаш илаш куснена? – шонкала самырык озавате.
Елена Анатольевна ден Андрей Альбертовичын икымше икшывышт, Елизавета, латик ий ончыш ош тӱняш толын. Кызыт ӱдыр Йӱледӱр кыдалаш школышто 5-ше классыште тунемеш. Физкультурым йӧрата, ече дене кошташ келша. Кокымшо икшывышт – Александр. Тудо кокымшо классыш вончен. Астрономий дене кылдалтше программе-влакым ончаш да книгам лудаш йӧрата. Ныл ияш Аня ден кок ияш Арсентий Йывансола йочасадыш коштыт. Кеч тушто кызыт икшыве шагал, нунылан пеш келша. Кажне кечын, йочасад гыч пӧртылмекышт, «Таче тидым ыштенна, тудым пален налынна, тыге модынна» манын, ача-авалан куанен каласкалат. ™дыр-эрге-влак моткоч поро кумылан, весела, полыш кидым шуялташ ямде улыт. Пырля модыт, юарлат, икте-весыштлан эре полшат. Южгунам сырен кудалтат гынат, тидын нерген пеш вашкен мондат. Кугурак-влак изирак-шамычым ончаш полшат. Тиде огыл мо пиал?
– Елена Анатольевна, тендан шонымаште, еш пеҥгыдылык мо деч шога?
– Ешым чумыраш шонымо годымак самырык мужыр коклаште икте-весым умылымаш, пагалымаш, аклымаш да йӧратымаш лийшаш. Тидын деч посна ончыко каяш неле. Еш илыш – тиде моткоч кугу паша. А икшыве – эн кугу пиал. Ме гын, пелашем дене шуко шочшан ача-ава улына. Тугеже ме икмыняр пачаш пиаланрак улына.
Шуко шочшан самырык ешлан пиалым, умылымашым, келшымашым тыланена. Тек икшывышт кажне кечын куандарат.
