Кызыт мӧҥгыштӧ мом гына огыт ашне?! Эсогыл южышт теҥыз сӧсна, куголя, комаголя, шиншилла, рак дене йолташ лийын шуктеныт. Йошкар-Ола деч тораште огыл верланыше Семёновка селаште илыше Тушинскиймыт ешыште хелена урлык шайтаным да черри урлык креветкым ончат. Тидын нерген суртоза дене мутланышна.
– Владимир Анатольевич, шайтаным налаш шонымаш кузе шочын?
– Йочам годым мӧҥгыштына аквариум эре лийын. Кирилл эргыланна да Милена ӱдырланна (снимкыште) ковашт икмыняр ий ончыч лу литран аквариумым пӧлеклен. Жап эртымеке, тудо изиракла чучын. Вара витле литраным налынна. Эн ондак ме изи кол-влакым веле ашненна. Аквариумлан келшыше кушкыл дене пырля мемнан деке катушко урлык шайтан-шамыч логалыныт да моткоч писын шарленыт. Нунын дене мом ыштышашым пален огынал. Интернетыште тӱрлӧ уверым лудмеке, лу хеленам налынна. Нуно пеш мотор, пачемыш тӱсан улыт. Икмыняр арня гыч катушко шайтан-шамыч деч ракывотышт веле кодын. Кызыт хелена-шамыч сомики, данио да моллинезия кол-влак дене пырля илат.
– Хелена мом кочкеш?
– Посна кочкышым огына нал. Коллан веле кочкышым пукшена. Очыни, нунын пелен кочкыт. Ме йоча-шамыч дене вӱдым вашталтена, фильтрым эрыктена. Шайтанлан нимогай ешартыш тӱткыш ок кӱл. Кирилл ден Миленан шинча йӱлен ончымыштым ужаш – мыланна кугу пиал.
– Черри креветке-влак кумылдам мо дене савыреныт?
– Нуно кол семынак моткоч мотор улыт. Сылнын иймыштым, шудышто музыртатымыштым эскераш оҥай. Икана зоокевытыште коштмына годым шинчалан перненыт да коло креветкым налынна. Черри тыгак писын шарла, садлан южгунам интернет полшымо дене еҥ-влаклан пӧлеклена. Тек изи йолташна-влак нуныланат куаным кондат.
