«Авай, теве ужат, мый садак кумдан палыме айдеме лиям. Тый ӱмырет мучко мый денем кугешнаш тӱҥалат», – кажне гана, эргыжын ойлымыжым шарналтен, фотокартычкыжым ончен, Тамара Петровна шинчавӱдшым ӱштылеш. Элын талешкыжым ончен куштем манын, ава нигунам шонен огыл.
Артём Семёнов – кум падыраш кокла гыч кугурак шочшо. Изинек еҥ шинчаш перныше рвезе кушкын, сайын тунемын. Руш да марий литературым пагален, почеламутым сылнын лудын. Ава Чап-кагазше-влакым посна папкышке поген. Артём 9-ше класс деч вара И.С.Палантай лӱмеш тӱвыра да сымыктыш колледжыш тунемаш пурен. Кугу театрын сценыштыже модаш шонен. Шуко йолташым муын, лӱмлӧ еҥ-влак дене палыме лийын. Талантше утыр ылыжын. Почеламутым возкален, семым шкеак келыштарен.
Рвезе, 18 ийым темымек, салтак радамыш каен. Армий деч вара тунемын пытараш шонен, но пӱрымаш весе улмаш. Ик кечын ава серышым налын: «Аваем, нелеш ит нал, ит вурсо, но мый контрактыш кидпалым пыштенам, специальный сарзе операцийыш каем. Тиде Шочмо эл ончылно порысем. Ӱшане, садак пӧртылам, калыкын пагалыме еҥже лиям». Но… Артёмын ӱмыржӧ кугу сӧйыштӧ кӱрылтын. Рвезын йоча годсо шонымашыже шукталтын. Шочмо элнан геройжо лийын. Школышто геройын партшым почыныт, школыш пурымаште чап оҥам сакеныт.
Елизавета МИРОНОВА.
Волжский, Памар.
