Йошкар-Оласе 14-ше номеран гимназий пеленысе «Изи памаш» йоча ансамбльын ӱдыр-рвезыже-влак сценышке лектытат, куштымыштым лым лийде ончет. Нунын коклаште 6-шо классын тунемшыже Настя Ивановам ужаш лиеш.
– Ансамбльыш 1-ше класс гыч коштам. Ме марий муро, марий йӱла дене палыме лийына. Мыланем марий калык куштымаш утларак келша. Семже кумылым нӧлта. Мастарлык-нам ончыкташ тӱрлӧ кундемышке лектына. Медведево районысо шоҥгыеҥ-влакын пӧртышкышт мийыме поснак шарналт кодын. Коча-кова-влакын куаныштым ужаш мыланна кугу пиал лийын, – ойла Настя.
Ӱдыр тыгак современный куштымаш дене кылым куча. Национальный президент сымыктыш школышто мастарлыкшым вияҥда. Настя ончыкыжым калык куштымаш дене хореограф лийнеже.
