Ача, ачай, ачий, пелаш… Тыге ойлат ешыште пӧръеҥым. Тудо суртышто ожнысек оза лийын. Пӧртым чоҥен, сонарышке коштын, ешым йӱктен-пукшымо, тудым аралыме нерген шонен. Ача-влак кызытат ешын пиалже, волгыдо ончыкылыкшо верч тыршат. Нуно виян, патыр, лӱддымӧ, тыгодым умылышо, поро кумылан, пашаче улыт. Лач тыгай поро шомакым ойла пелашыж нерген Татарстан Республик Актаныш район Йӱштӧ Памаш села гыч А.А.Петрова.
Ончыкылык илышлан ямдылат
Алина Анатольевна ден пелашыже Эдуард Ана-тольевич Суарметов, вашла йӧратен, пагален, умылен, латвич ий наре илат. Коктынат верысе школышто пашам ыштат. Ава тӱҥалтыш класслам туныкта. Ача ороллан шога. Ешыште чыланат марла яндарын кутырат. Икшывышт Йӱштӧ Памаш школышто шинчымашым погат. Павел кандашымше классыште тунемеш, Марианна – визымшыште. Платон тений парт коклашке икымше гана шинчын. Йоча-шамыч марий мурым, куштымашым йӧратат. «Ший памаш» ансамбльыште мастарлыкыштым йочасад гычак таптат.
Павел тӱрлӧ конкурс ден мероприятийышке ушна. Ик эн кугу сеҥымашыжлан «Если бы я был Президентом» всероссийский конкурсын заочный йыжыҥыштыже сеҥыше-влак радамыш лекмыжым шотла. Рвезе келге шонымашан эссем возен. Яра жапыште сӱретлаш моткоч йӧрата. Павел ача-аважлан сурт сомылкам ышташ полша. Июнька ден Снежка каза-влакым, кроликым, ӱшкыжым онча.
Марианна изаж семынак сӱретлаш кумылан. Тӱрлӧ мультфильмысе герой-влакым воза. Коваштын, Ирина Тимиряновнан, мастарлыкше нунылан куснен, очыни. Платон шольыж дене когыньыштын сурт сомылкашт уло: чывым пукшат, кеҥежым чывигым, лудигым оролат.
– Шочшына-влакын конкурсышто сеҥымашышт тӱҥ огыл. Тӱҥжӧ – мастарлыкым погышт, еҥ-шамыч дене кутырен, кылым муын моштышт. Торашке тунемаш каят гын, нунын пелен лийын огына керт. Ончы-кылык илышлан парт коклаште шинчыме годымак ямдылалтман, – ойлат ача-ава.
Калык вургем сеҥымашым конда
Ешыште марий шӱлыш озалана. Йоча-влак кугезе коча-коваштын йӱлаштым, пайремыштым палышт ма-нын тыршат. Чыла гаяк марий пайремым: Шорык-йолым, ™ярням, Семыкым, Сортам – пайремлат. Кӱсотышко кумалаш коштыт.
Суарметовмыт марий тӱвырам палымыштым фотоконкурслаште ончыктат. Марий тувырым чиен, келшыше верым ойырен, сылне фотографийым ыштат. «День России», «Авай дене пырля», «Ава да икшывыже-влак – калык вургем дене», «Тувыремже пеш мотор» да моло конкурслаште сеҥышыш лектыныт.
– Йоча-влак ош тӱняшке мемнам алмашташ толыныт. Нунын кидыште – марий йылмын, марий тӱвыран, йӱлан ончыкылыкышт. Ожнысым жаплен, пален кушкышт манын, ме, ача-ава-шамыч, тыршышаш да примерым ончыктышаш улына, – ойлат Алина Анатольевна ден Эдуард Анатольевич.
