Марий Турек район Марий Купто школышто марий тӱвырам, йӱлам изинек пален кушкаш кумылан ӱдыр-рвезе-влак тунемыт. Нуно шочмо кундемыштын поянлыкыштым шымлат. Театр постановко гоч тудын дене калыкым палдарат. «Самырык тукым» республикысе йоча усталык конкурсышто «Чембылат илем але кушеч Марий Купто тӱҥалын» легендым модын ончыктеныт да кумшо верым сеҥен налыныт. Тиде «Волшебное слово» школ театрын лектышыже. Тудым И.З.Ухова вуйлата.
– Икмыняр ий ончыч «Мари-Купта вчера и сегодня» кугу альбомым чумыренам. Тушто карт кугыза, кумдан палыме еҥ-влак, клуб, книгагудо да моло нерген поян уверым муаш лиеш. Школыштына журналист-влак Наталья Ямаева, Эльвира Терентьева, поэтессе Ирина Закиева, мурызо-шамыч Снежана Орлова, Анита Феок-тистова, ялозанлык шанче кандидат Василий Хлебов, филологий шанче кандидат Валентин Васильев, КПСС Марий обкомын икымше секретарьже Иван Гусев да ятыр молат тунемыныт. Ме нунын дене кугешнена, – ойла Ираида Зиновьевна.
Поян историян ял молан лач тыге маналтеш, палаш оҥай лие. Вашмутым муым. XVI курым тӱҥалтыште марий калыкым Озаҥ вел гыч татар хан ишен, вес вел гыч – руш кугыжа. Марий-влак тале сарзе лийыныт гынат, кок могырым ишымым чыташ куштылго лийын огыл. Тиде жапыште Чембулат лужавуй, ешыжым, родо-тукымжым поген, ты кундемышке толын улмаш. Тыште йырым-йыр куп лийын. Икана руш толын да йодын: «Тыгай ялже кушто?» Марий пӧръеҥ рушла кутырен моштен огыл да тыге вашештен: «Там, где куп-то». Тыге ялым Марий Купто манаш тӱҥалыныт.
– Ялна куд уреман. Кок кевыт, мотор кугу школ улыт. Марий Купто воктеч Куптинка эҥер йоген эрта. Ожно Кужважка маналтын. Ялыштына ожно руш-влакат иленыт гын, кызыт марий калык икте-весылан полышкален, келшен, йӱлам шуктен ила, – мутланымашке ушнышт йоча-влак.
Ялыште марий шӱлышан ӱдыр-рвезе-влак кушкыт гын, Марий Куптын ӱмыржӧ кужу лиеш манын ӱшан уло.
