Руэм кыдалаш школын 4-ше «А» классыштыже тунемше-влаклан «Ныл ӱдырын историйже» класс шагат эртаралтын. Туныктышо М.В.Александрова ныл ӱдыр лӱмеш медаль дене палдарен. Медальыште кӧмыт улыт? Тиде Ленинград гыч Таня Савичева, Германийыште шочшо Анна Франк. Изи ӱдыр-влак Кугу Ачамланде сарын шучкылыкшо нерген дневникым вӱденыт. Кумшо ӱдыр – Хиросима ола гыч Садако Сасаки. Шочмо олаже ӱмбак атом бомбым кудалтымылан кӧра нелын черланен. Нылымше ӱдыр – Америке гыч Саманта Смит. Тудо Российыш толын, элнан тыныс илыш верч улмыжым умылен. Нине изи ӱдыр-влак XX курымын тыныслык символышкыжо савырненыт.
1989 ийыште Тыныслыкым аралыше комитет ты медальым йоча-влакын пиалышт верч кучедалше еҥ-шамычлан пуаш палемден.
Л.ПАВЛОВА.
Медведево район.
