Ялыште шочын-кушшо марий ӱдыр-рвезе-влак, олашке тунемаш кайымеке, ятырынже ӱмыр мучкылан тушан лакемыт. Ешым чумырат, икшывышт шочеш. Кудывечыште ньога-шамыч рушла кутырат, йочасадыш каят – туштат руш шӱлыш озалана, школыштат – тыгаяк сӱрет. Тыге марий ача-аван икшывышт рушаҥыт, но чыланжак огыл. Теве Йошкар-Олаште илыше Алексеевмыт эргышт-влакын чонышкышт марий йылмын юзо вийжым шыҥдарен кертыныт.
Ирина Геннадьевна ден Николай Викторович коктынат Морко район гыч улыт. Ава Марий кугыжаныш университетысе Калыкле тӱвыра да тӱвыра-влак кокласе кыл институтышто костюмерлан пашам ышта. Суртоза Моско олаште чоҥымаште тырша.
Кум эрге
Алексеевмыт кум эргым ончен куштат. Кугуракше, Мирослав, Йошкар-Оласе 10-шо номеран школын 6-шо «Б» классыштыже тунемеш. Никита шольыжо 19-ше номеран школыш коштеш. ™маште парт коклашке икымше гана шинчын. Рвезе-влак тхэквондо дене кокымшо ий кылым кучат. Ик таҥасымаште Никита икымше лийын, Мирослав кумшо. Никита 6-шо номеран сымыктыш школышто баян дене шокташ тунемеш. Фёдор ныл ияш. Тудо 80-ше номеран «Ӱжара» йочасадыш коштеш. Изаже-влак семынак спортсмен лиеш, очыни.
Оласе йоча ӧрыктара
Ача-ава икте-весышт коклаште марла гына кутырат. Тидым ужын, эрге-влакат кумылаҥыт.
– Мирослав эн ондак рушла кутырен. Мемнам колыштын, шке гыч тунемын. Кум ияшыж годым ала-мом йодмыланна марла вашештен. Ме ӧрынна, тыгодым моткоч йывыртенна. Ялышке коча-кова дек унала каена, уремыште йолташыже-влак дене марла кутыра. Изиракше годым ялысе йоча-шамыч рушла огыт мошто манын шонен. Уремыште кугыеҥ-влакым вашлиеш – марла мутлана, кевытыш сатулан кая – марла пелешта. Кевытче-влак Мирославым мокталтат, – ойла Ирина Геннадьевна.
Никита ден Фёдор кызытеш марла начарынрак мутланат гынат, тыршат, кумылыштат уло. Мирослав изаштым ончен, тудын семынак яндарын кутыраш тӱҥалыт манын ӱшаныме шуэш.
«Авай дене пырля»
Ача-ава, икшывышт ма-рий йылмым сайын палышт манын, тӱрлӧ йӧным кучылтыт. «Интеллектуал» тӱвыра да увер рӱдер пелен пашам ыштыше «Авай дене пырля» школ-студийыш эргышт-шамыч дене шуко шоныде ушненыт. Йоча-влак авашт дене пырля шочмо йылмым модыш йӧн полшымо дене шымлат, тӱвыра, йӱла дене лишкырак палыме лийыт.
– Марий йылме – тӱняште ик эн мотор йылме. Тудым йӧратыман да аралыман. Ме марий улмына деч нимыняр огына вожыл, кугешнена веле. Марий пайремым пайремлена, марий йӱлам жаплена. Тек шочмо йылмынан ӱмыржӧ кужу лиеш, – ойлат ача-ава.