Марий тӱвыра рӱдерын эртарыме «Колышт, Йӱштӧ Кугызай» почеламутым сылнын лудмо конкурсышто ятыр паша аклалтын. Теле, У ий, Йӱштӧ Кугыза дене кылдалтше почеламутым лудмыштым республикын чыла гаяк районжо гыч тунемше-влак видеош войзен колтеныт. 6-9, 10-12 да 13-15 ияш ӱдыр-рвезе-шамычын пашаштым посна акленыт. 10-12 ияш-влак коклаште икымше верым У Торъял район Немда кыдалаш школышто 5-ше классыште тунемше Диана Маличенко (снимкыште) сеҥен налын. Нина Щербакован «Чылт йоча» почеламутшым лудмыж дене ойыртемалтын. Сылнымут конкурсыш ушнаш аваже И.Э.Маличенко таратен. Тудак Дианам сылнын лудаш туныктен. Кажне кечын тыршымаш арам лийын огыл. Лудмаш конкурсышто сеҥымаш ончыклыклан ӱшаным пуа.
