Озаҥ оласе Рушарня школышко марий ача-аван, коча-кован 12 йочашт да уныкашт коштеш. Шукерте огыл марий пӧлкан туныктышыжо Алёна Токташова йоча-влакым марий тӱрым ырес дене тӱрлаш туныкта.
– Озаҥ оласе Марий калыкле тӱвыра автономийын погынымашыштыже каҥашымеке, ик шонымашке шуынна. Эн ондак мый шке тӱрлӧ материалым кычалынам, онченам, книга-влакым лудынам. Вара презентацийым ончыктенам. Кажне тӱрын мом ончыктымыжым эркын-эркын тунемаш тӱҥалынна. Йоча-влак руш вургемым чият гынат, тушто марий тӱрым ужыт. Ойлат: «Мыйын тувырыштем марий тӱр уло». Икшыве-влаклан оҥай, – ойла А.Токташова.
Алёна марий тӱрым изи годсек тӱрла. Тудым коваж ден аваже туныктеныт. Морко район Шеҥше школышто 5-6 класслаште тунеммыж годым тӱрым тӱрлаш тунемын. Лач еш, школлан кӧра ӱдырын чонышкыжо марий шӱлыш эрелан шыҥен. Кызыт тиде шӱлышым изи икшыве-влаклан пӧлекла.
Марий калыкын пӱрымашыже – йоча-влакын кидыште. Оласе йоча-влаклан марла кутыраш неле. Озаҥ оласе школлаште руш ден татар йылмылам тунемыт. Туге гынат марла кутыраш тыршат. Марий ден татар йылмылаште икгай шомак-влакым кычалыт. Тӱрлымо деч посна марла кушташ, марий мурым мураш тунемыт.
