Волжский район Памар селасе кок пачашан пӧртыштӧ тоштер уло манам гын, йоҥылыш ом лий, шонем. Тушто коллекционер В.В.Лобанов ила. Ик пӧлемыште оҥай сувенир, марий вургеман курчак, тӱрлӧ фотоаппарат да моло арвер-влак улыт. Туштак СССР жапысе пионер-влакын горнышт, галстукышт аралалтыт.
– Василий Владимирович, тыгай коллекцийым погаш кузе да кунам шонымашда шочын?
– Тукымемлан шарнаш мо гынат кодшо шонымаш дене коллекцийым чумыраш тӱҥалынам. Кок ий ончыч тошто пӧрт коклаште кугезе ковамын шондыкшым муынам. Тушто ожнысо марий вургем, сӱаныш чийыме сӧрастарыш-влак киеныт. Кызыт кандаш тукымын вургемже аралалтеш.
– Те шуко тӱрлӧ арверым погеда, оксалат налыда. Кокымшо пачаш сар теме дене кылдалтын. Тудо, очыни, тыланда эн шерге.
– Тений Кугу Ачамланде сарыште сеҥымылан 75 ий темеш. Пайрем вашеш коллекцийыш ятыр арверым ешаренам. Чыла тиде совет салтак-влакым шарныме лӱмеш. Сеҥымашын акшым икшыве-шамыч палышаш улыт. Кызыт коллекцийыштем 300 утла салтак серыш, гранат, снаряд, сар курал, обмундирований, танкын модельже, сар годсо плакат-влак аралалтыт. Фронт гыч толшо ик серышымат шинчавӱд йоктарыде лудаш огеш лий. Кажне серыш – илышыште лийше посна историй.
