Тунеммаште, тӱвыраште, спортышто да моло аланыште кугу кӱкшытыш шушо ӱдыр-рвезе-влаклан «Артек» тӱнямбал йоча рӱдерыште канаш йӧн пуалтеш. Теве Марий Турек район Арбор школын тунемшыже Адам Малининлан «Наследники Великой Победы» сменыште лияш пиал шыргыжалын. Тудо тале спортсмен.
– Тӱрлӧ лӱдыкшӧ ситуацийыште шкем чын кучымо нерген занятий, усталык мероприятий-влакым мыланна эртареныт. Шинчымашым пеҥгыдемдаш сай йӧн пуалтын, – ойла Адам.
Самырык спортсмен районышто, республикыште, Российыште эртаралтше таҥасымашлаште вийжым терга. «Лӱдыкшыдымылык школ» республикысе соревнованийыште ий еда сеҥышыш лектеш. Спорт туризм, шахмат дене пеҥгыде кылым куча. Футбол дене талын модеш, куржталеш, ече дене коштеш. ГТО нормативым сайын сдатлымыжлан шӧртньӧ значокшо уло. Физкультур дене районысо олимпиадыште сеҥышыш лектын.
– Тыгай сеҥымашке шумылан физкультурым туныктышо Людмила Николаевна Семёновалан кугу таум ой-ем. Мый капкылемым кажне кечын шуарем. Ончыкыжым МЧС пашаеҥ лийнем. «Писынрак, кӱшкырак, талынрак» манме ойым ушыштем эре кучем, – ойла Адам.
