Ты кечын Морко тӱвыра полатыште пайрем шӱлыш озаланен. Сылне муро сем кумылым нӧлтен, модыш площадке йоча-влакым иквереш чумырен. Фототворчестве ончер, мастер-класс-влак йоча-шамычлан жапым веселан эртарашышт йӧным ыштеныт. М.Н.Янтемир лӱмеш литератур да этнографий тоштерын пашаеҥже-шамыч пайдале экскурсийым эртареныт.
Иван Ефремов Йошкар-Оласе 10-шо номеран школын икымше классшым тунем пытарен. Марий тӱран йошкар галстукан рвезын марла чаткан кутырымыжым колмеке, лишкырак палыме лийде шым чыте. Иван «Колумб лудмаште» икымше гана таҥасен. Почеламутым сылнын лудаш туныктышыжо Е.С.Зыкова кумылаҥда. В.Колумбын почеламутшо-влак кокла гыч келшышым пырля ойырен, аваж дене мӧҥгыштӧ тунемын. Иван 8-10 ияш-влак коклаште икымше верым сеҥен налын.
– Яра жапем школысо книгагудышто эртараш йӧратем. Почеламутым, йомакым кумылын лудам. Кугу сценыш икымше гана лектынам. Сандене изиш тургыжланышым. Йоча-влаклан келыштарыме площадкыште мастарлыкем ончыктышым. Яндар южышто почеламутым лудмем видеош войзышт. Кроссвордысо йодыш-влаклан вашмутым кычалмылан сертификатым кучыктышт, – ойла марий рвезе.
Жюрин еҥже-влак конкурсант-шамычым литератур да муро таҥаслаште акленыт.
В.Колумбын почеламутшым лудшо-влак коклаште сеҥышыш лектыныт:
7 ияш марте – Настя Поликарпова (Йошкар-Ола, 80-ше №-ан «Ӱжара» йочасад);
11-14 ияш-влак коклаште – Таня Суворова (Морко, Коркатово);
15-18 ияш-влак коклаште – Надя Баранова (Советский, Ӱшнӱр).
