«Тыныс илыш вашкерак толжо! Салтакна-влак мӧҥгӧ вашкерак пӧртылтышт ыле!» тыгай шонымаш дене таче изижат-кугужат илат. Сеҥымашым лишемдымаште Кужэҥер район Топкавлак книгагудо пелен пашам ыштыше «Новые звёздочки» ушемат тырша. Краевед Ю.Г.Светлакован вуйлатымыж почеш ӱдыр-рвезе-влак ятыр поро сомылым шуктат.
– Ты ушемын пашаже уныкам дене обелискым эрыктыме гыч тӱҥалын. Тудо кеҥежлан ялыш толшо йоча-влакым поро сомылым шуктымашке ушен. Вара школышто тунемше-шамыч чумыргеныт. Кызыт ушемышкына 1-8-ше класслаште тунемше йоча-шамыч шке кумылын коштыт. Патриотизм виктышым тӱҥлан шотлена, – ойла Юлия Геннадьевна.
Ушемыште идалыкын кажне пагытыштыже паша шолеш. Йоча-влак специальный военный операцийыш колташ яллаште 85 выньыкым, 24 мушкышым, 19 газ баллончикым, тыгак коштымо грушым, чеснокым погеныт. Армейский душым, борщым ыштеныт, киндым коштеныт. Макулатурым поген, оксаж дене эмым налын колтеныт. Салтак-шамычын серышым возеныт да моторын сӧрастареныт.
– Эше ик эн кӱлешанлан окопысо сортам ямдылымым шотлем. Йоча, ача-ава-влак дене пӱгыльмым, калык деч оксам, калай атым погенна. Ончычсо тунемшем-влакат окса дене ятыр полшеныт. Эн кугу шӱкалтышым верысе чыве фермым вуйлатыше Владимир Владимирович Нестеренко ыштен. Тудо кок бочко шыштым пуэн. Калай атым погымаште Коҥганур гыч Марина Львовна Юнусова ятыр тыршен. Книгагудо вуйлатыше Ольга Николаевна Мокеева полшен. Пашашке изижат-кугужат, илалшыжат ушненыт. Тыге 600 утла сортам ыштенна. Чылалан кугу тау! – ойла Юлия Геннадьевна.
«Новые звёздочки» ушемын еҥже-шамыч Кугу Ачамланде сар годымсо тылын труженикше-влакымат огыт мондо. «Женщина и есть мир» всероссийский акций радамыште Пӱнчерйымал гыч 90 ияш Е.В. ден Н.В.Изергинамыт, Топкавлак гыч 95 ияш Е.Д.Куклина ден Р.Ф.Одинцова дек унала миеныт. Ожнысо илыш нерген ятыр уверым, сеҥымашын акше нерген пален налыныт.
Икманаш, сеҥымашым лишемдаш изижат-кугужат полшат, тугеже тыныс илыш вашке толеш!
Х.АЛЕКСАНДРОВА.
Фотом книгагудын архивше гыч налме.
