Вуйдорыкын шола полушарийже логикылан, тӱрлӧ уверым лончылымашлан, ойым тергымашлан, датым, лӱмым, тӱрлӧ фактым шарнен кодмашлан вуйын шога, пурла полушарий – шижын моштымашлан, тӱрлым шонен лукмылан, проблемым тичмаш умылымашлан. Те вуйдорыкын пурла полушарийже дене сӱретлымаш нерген колында? Тыгай йӧным Звенигово район Сӱзлэҥер школышто рисованийым туныктышо Н.В.Михеева урокышто кучылтеш (снимкыште).
– Наталья Владимировна, тиде сӱретлымаш мо дене ойыртемалтеш?
– Тыгодым чон дене пашам ыштыман. Мутлан, пӧртым сӱретлаш кӱлеш. Вуйдорыкын шола полушарийже пӧртым квадрат, треугольник, цилиндр гыч сӱретла. Пурла полушарий дене «илыше» пӧрт лектеш. Кажне йоча иксемын моторын сӱретлен огеш керт. Кумылжо вола, ӱшанже йомеш. Садлан уроклаште тиде йӧным кучылтам. Тунемшем-влак «мый ом мошто, моторын огеш лек» манын огыт лӱд. Нуно палат: сӱретышт садак эн чапле да ойыртемалтше. Тыште тӱҥжӧ – усталык. Йоча мом ужеш, тудым сӱретла.
– Вуйдорыкын пурла полушарийже дене сӱретлымашын пайдаже могай?
– Тудо тӱняумылымашым вияҥда. Йоча мом ужмыжым писын шарнен кодаш тӱҥалеш. Шонен лукмашлан эрык пуалтеш. Икшыве шкенжым аклаш тунемеш, проблеме-влак нерген монда.
– Тиде йӧн дене пайдаланен, профессионал семын сӱретлаш тунемаш тӱрлӧ упражнений уло. Иктыж дене палдарыза.
– Шуко контуран сӱретым налза. Мутлан, карандаш дене айдемым сӱретлымым. Тудым унчыливуя пыштыза. Кажне корным чылт сӱретысе семын корыза. Эн ончыч кӱжгырак корным ойырен ида сӱретле. Кушеч тӱҥалында, тудым умбакыже шуйыза. Моло корно-влак шинчалан ынышт перне манын, лаштык дене петыраш лиеш. Кажне линий тичмаш сӱретын ужашыже манын умылен сӱретлыман.
«Пурла» сӱретлымаш
