И.С.Палантай лӱмеш тӱвыра да сымыктыш колледжын Калыкле сымыктыш гимназийыштыже «Шочмо йылме – калык поянлык» йоча фестиваль эртаралтын. Образований аланыште тыршыше уста педагог-влак икмыняр направлений дене урокым ямдыленыт. Тиде тӧнежыште лу ий воспитательлан пашам ыштыше Н.В.Кузнецова 7-ше классыште тунемше-влаклан курыкмарий йылмын сылнылыкше, пайдаже нерген темым почын пуэн.
Марий Эл Републикын калык туныктышыжо Л.А.Сергеева «Марий литератур урокышто кейс технологий дене пайдаланымаш» этноурокым вӱден. Тудо Волжский район Карай школышто 41 ий икшыве-шамычым шочмо йылмылан шӱмаҥда.
– Тачысе пашаштем Ким Васинын «Ший мундыра» книгаж гыч ужашым кучылтынам. Писательын илыме жапысе ола кызыт вашталтын. Мо дене тудо ойыртемалтеш? Лекше йодышлан вашмутым тунемше-шамыч проектыштышт пуэныт. Вес командыште улшо ӱдыр-рвезе-влаклан тӱрлӧ калыкын ваш келшен илымыштым, кочкышыштым ончыкташ заданий лийын (снимкыште), – ойла Любовь Анатольевна.
Гимназийыште 8-ше «А» классыште тунемше-шамыч Кирилл Королёв ден Александр Веткин марий калыкын кумалтышыже нерген проектым араленыт. Кӱчык жапыште сӱретым, фотографийым кучылт моштеныт.
Марий тӱр нерген этнодизайнер Н.К.Акиева ден гимназийыште ятыр ий воспитательлан пашам ыштыше Н.А.Воронцова каласкаленыт.
Марий тӱвыра рӱдерын эртарыме пайрем сылне концерт дене мучашлалтын.
З.ТИМОФЕЕВА.
Р.НИКОЛАЕВАН фотожо.
