Йоча-влак изинек ача-авалан ӱшанен, нунылан эҥертен кушкыт. Южышт эсогыл почешышт огыт эрыкте, школ сумкаш арверым шке огыт опто, урокымат шкевуя огыт ыште. Ача-ава-влак чыла умылат гынат, лучо шке ыштем манын шонат. Тидын деч кузе кораҥаш? Тиде йодышлан психологий да педагогике, медицине да социальный полышым пуышо «Детство» рӱдерын педагог-психологшо Л.А.Глазкова вашешта:
– Йоча кеч-могай пашам шке гыч ышташ ок тунем. Тидлан изинек шӱмаҥдыман. Эн ончыч модышым верышкыже пышташ кӱлмӧ нерген умылтарыман, ныл йолан йолташ-влакым эскераш, пеледышыш вӱдым шаваш кумылаҥдыман. Икшыве шке пӧлемжыланат оза лийшаш да мутым кучышаш. Чыла пашалан иканаште туныкташ ок лий, йыжыҥ дене «ошкылман». Холодильникыш стикерым пижыкташ да шарныктыш-шамычым возаш лиеш. Мутлан, «кочкынат – кӱмыж-совлам муш», «толынат – йолчиемет эрыкте да кошто», «урокым ыштенат – учебникым верышкыже пыште» да молат. Иканаште тунем ок шу гын, изиш чыталтыман. Тӱҥалтыште тыге ышташ лиеш: школышко каяш йолчиемым ямдылен огыл гын, ик кемым крем дене эрыктыман, весым лавыраным кодыман. Йоча садак ужеш да кокымшыжым шке шотыш конда. Кеч-могай пашам ышташ тореш лиеш гын, амалжым умылаш тыршыман да кутырыман.
