Республикысе курчак театрыште «Семейные вечера» шкешотан фестиваль эртаралтын. Тудо Марий Эл Республикын калык артистше Эльвира Лисицынан да режиссёр, художник-постановщик, Марий Эл Республикысе сымыктышын сулло пашаеҥже Татьяна Батракован театрыште пашам ыштымыштлан 35 ий теммылан пєлеклалтын. Ты фестивальын ойыртемже нерген Э.Лисицына дене мутланышна.
– Эльвира Семёновна, фестивальым молан тыге лӱмденда? Тудын тӱҥ шонымашыже могай?
– Спектакль-влакым кастене ончыктенна. Ача-ава-влакын паша кечышт мучашлалтмеке, икшывыштым йочасад, школ гыч налын, мемнан деке толашышт йєнан лийже манын, тыге кутырен келшенна. Тӱҥ шонымашлан еш дене жапым оҥайын да пайдалын эртарымашым шотлена. Спектакльла гыч коча-кова, ача-ава-шамыч моткоч йывыртыше лектыныт. Нуно йомак мучко икшывыштын, уныкаштын куанымыштым, тургыжланымыштым эскереныт.
– Те йомаклаште коктын я кумытын веле модында. Тынар геройын образшым почаш кугу мастарлык кӱлеш.
– Ик спектакльыште, мутлан, латик герой уло. Коктын модаш куштылго огыл, но мыланем ик роль гыч весыш куснаш оҥай лийын. Теве пырысым модат, теве колям, теве ковам…
– Могай йомак-влакым ончыктенда?
– «Про лося», «Крошка Енот», «Умка», «Кошкин дом», «Вот какой рассеянный с улицы Бассейной!», «Колыбельная» спектакль-влакым калык ончыко луктынна. Шуко йомакшым йоча-влак палат, шонем. «Про лося» спектакль пеш оҥай. Шордын чодыраште кудалыштмыж годым тӱкышкыжє тӱрлє янлык шинчеш. Эсогыл Маска шкаланже верым муэш. Мучаште Шордо ойла: «Мый каласаш йєршын монденам. Таче чыла шордо тӱкыжым кудалта». А тушто мо гына уке?! Шиште, Корак, Эҥыремыш да молат. Нуно икмыняр пєлеман пачерым чоҥен шуктеныт.
– Тыгай фестиваль ончыкыжымат эртаралташ тӱҥалеш?
– Нине спектакль-влак дене вес олаш каяш темленыт. Кок-кум еҥан спектакль дене гастрольышкат лекташ куштылгырак. Тыгаяк фестивальым эше ик гана эртараш кумыл уло. Йоча, ача-ава, коча-кова-влакым пагален ӱжына.
