Йоча-влак, туштан вуймутлан вашмутым муын шуктышда? Тиде телым кайык-влакым пукшымаш лиеш. Кызыт нунылан неле пагыт толын: кочкышым лум леведын. Сандене кайык-влаклан полшыман, кормушкым ыштыман да кочкышым оптыман.
Медведево район Руэм школышто 2-шо «Б» классыште тунемше Маша Экман кушкыл ден янлык тӱнялан шӱман. Ава-ачажлан сурткайыкым ончаш полша. Шукерте огыл пакчаштышт кормушкым сакеныт. Ынде Маша кажне эрдене кайыкым пукшаш лектеш (снимкыште). Йоҥыштымо пырчым да кинде пудыргым пуа. Кормушкыш пӧрткайык ден ильывуй толыт.
Волжский район Пӧтъял гыч кум ияш Алёша Никифоров (снимкыште), Андрей изаж дене пырля кайыклан кочмыверым ыштымеке, шулдыран йолташ-влакым сийлаш ок мондо. «Ме поро пашам ыштена, пӱртӱсым аралена, кайыклан полшена. Нуно шошым сад-пакчаште шукш-копшаҥгым пытарат», – ойлат иза-шольо.
Л.ГРИГОРЬЕВА.
Фото-влакым еш архив гыч налме.
