Школьник-влакын российысе толкынышт кажне кечын гаяк мероприятийым, акцийым да конкурсым эртара. ™дыр-рвезе-шамычлан вияҥашышт у корным почеш. Йӧным моштен кучылтман да ончыко каяш лӱдман огыл. Тыгай шонымашан Марий Турек школын 11-ше классыштыже тунемше Елизавета Гвоздева (снимкыште).
Ӱдыр кеҥежымат жапым пайдалын эртарен. «Детская iВолга» форумышко миен коштын.
– Мыланем форумын сайтышкыже йодмашым колташ темленыт. Мый тушко грамот ден дипломем-влакым вераҥденам. Тыгай кугу мероприятийышке логалам манын шоненат омыл. Туге гынат пиал шыргыжалын. Тушто кажне кечын илыш «шолын». Ме калык ончылно шкем кучаш тунемынна. Ик площадкыште чын малыме нерген кутыренна. Вес кечын мультфильмым ямдыленна. Кумдан палыме ятыр еҥ дене вашлийын мутланенна. Тиде форум поро шарнымашым коден. Мый тушеч вестӱрлӧ шинчаончалтышан толынам, – тудо татышке уэш пӧртыльӧ Лиза.
Чолга ӱдыр «Leadership Biler» форумышто шинчымашыжым келгемден. Шко-лысо поро кумылым ончыктышо отряд-влакын «Компас добровольчества» слётыштышт лийын. «Семейный марафон добрых дел» акцийышке ушнен. Школышто эртаралтше кажне гаяк мероприятийыште да конкурсышто чолгалыкшым ончыкта.
– Школьник-влакын российысе толкынышт вияҥаш, вашталташ, у еҥ-влак дене палыме лияш, шинчымашым келгемдаш йӧным пуа. У кумда корным почеш. Тышке ушнымемлан моткоч йывыртенам, – ойла Лиза.
