Йошкар-Оласе 61-ше номеран «Теремок» йочасадыште Кугу Ачамланде сарыште Сеҥымашлан 80 ий теммылан пӧлеклалтше Сеҥымаш парад эртаралтын. Самырык тукым деке унала СВО-што лийше салтак, военнослужащий да силовой структурлаште пашам ыштыше-влак толыныт.
Парадым школыш каяш ямдылалтше йоча-шамыч строй дене ошкылын да речёвкым ойлен почыныт. Моло ӱдыр-рвезе-шамычат рыҥ ошкыл моштымыштым ончыктеныт. Мероприятий «Курымашлык полк» акций дене мучашлалтын. Кугырак-влакым пагалаш да шарнаш, шочмо кундемым да тудын эртыме корныжым шымлаш туныктен, ме ӱшанле у тукымым ончен куштена.
Татьяна КУТЮКОВА.
Фотом йочасадын архивше гыч налме.
