Марий тиште кече вашеш ме, «Ямде лий» газетын пашаеҥже-влак да Эчук ден Пампалче, Йошкар-Оласе 2-шо номеран школышто уна лийынна. 1-2-шо класслаште тунемше ӱдыр-рвезе-влак туныктышышт дене пырля оҥай программым ямдыленыт. Почеламутым марла лудыныт, муреныт, куштеныт. Тунемше-влак марий пайремыш икымше гана ушненыт. Ме газет илыш, юнкор паша дене палдаренна, туштым туштенна. Эчук ден Пампалче сылне сем почеш куштеныт. Шӱм-чоным куандарыше, уш-акылым пойдарыше пайрем йоча-влакым марий йылмым утларак тунемаш да «Ямде лий» газет дене кылым кучаш кумылаҥден.
