Ава – улыжат кум букван, тыгодым шӧртньӧ дене возымо виян шомак. Тушко шокшо тул, йӧратымаш, порылык, волгыдылык, ныжылгылык иктӧр шыҥеныт. Тиде айдеме мыланна кугу илышым пӧлеклен. Мемнам, изи падырашым, кидышкыже налын, йӱд мучко шыма мурым мураш я шепкаште рӱпшаш ямде лийын. Икымше шомакнам лач ава колын, икымше ошкылнам лач тудо шекланен. Икымше йодышлан вашмутым лишыл еҥна пуэн, икымше йоҥылышнам лач тудо тӧрлен. Нелылыклан кӧра чакненна гын, суксыла арален, ончыко мастарын вӱден моштен. Авам герой дене таҥастараш лиеш. Чоныштыжо шӱлык, ойго озаланат, логарышкыже кочо комыля толеш гынат, тудо эре порын шыргыжалеш, ӱмбакна ныжылгын ончалеш. Паша деч вара мӧҥгӧ ноен пӧртылеш гынат, икшывыже-влак ден пелашыжлан кӧра курыкым савыра. Лач тыгаяк Звенигово район Красногорский посёлко гыч М.Г.Данилова.
Марина Гурьевна ден Алексей Иванович Даниловмыт, марий сӱан дене латныл ий ончыч ушнымеке, кум икшывылан ош тӱням пӧлекленыт. Озавате Кичиер посёлкысо медицинский реабилитаций эмлымверын йоча отделенийыштыже воспитательлан пашам ышта. Пелашыже Красногорский автофургон заводышто слесарь-сборщикын сомылжым ятыр ий шуктен, кызыт – мастер. Пашалан кӧра Марина Гурьевналан мӧҥгыштӧ шагалрак лияш логалеш гынат, уло йӧратымашыжым, яра жапшым ешыжлан пӧлекла.
– Кажне ава икшывылан йолташ лийшаш. Йоча лишыл еҥжылан кеч-момат лӱдде, аптыраныде ойлышаш. Ме умылен моштышаш да кертме семын пайдале ой-каҥаш дене эре полшышаш улына. Йоча ӱшана гын, мемнан кокласе шӱртӧ нигунам огеш кӱрл. Тудо курымла дене ушаш тӱҥалеш, – ойла ава.
Ача-аван куанышт
Ача-ава да икшыве кокласе кыл чынже денак пеҥгыде. Кеч-могай сомылымат икте-весе дене каҥашен ыштат. Илья 7-ше классыште тунемеш, Вадим – кудымшышто. У ий вашеш шочшо, йомаклан ӱшанаш таратыше изи чинче падырашышт, Настя, 2-шо классыш коштеш. Кугурак эргышт хоккей дене пеҥгыде кылым куча. Верысе «Мотор» командыште шуаралтеш, капкам орола. Ончыкылык илышыжым спорт дене кылдынеже. Вадим Йоча усталык пӧртыш кажне гана куанен вашка. Тудо «Информашка» кружокыш коштеш, программист лияш шона. А Настялан мураш, кушташ, сӱретлаш да ан-гличан йылмым тунемаш келша. Л.Л.Пакалинан вуйлатыме «Изи шӱдыр» йоча ансамбльыш коштеш. Нуно марий мурым йоҥгалтарат, мастарлыкыштым тӱрлӧ конкурсышто ончыктат.
Даниловмыт кызыт пӧртым чоҥат, У ийлан у суртыш илаш пурынешт. Садлан рвезе-влак ачаштын эн ӱшанле полышкалышышт улыт. Настят пашаче: аважлан сурт сомылкам ышташ полша.
– Шуко шочшан ача-ава лияш – пиал. Туге гынат икшывылан мутым кучыман, эҥертыш лийман. Кажныже пиалан лийже манын, ме чыла ышташ ямде улына. Илыш дене тӧр ошкылаш, нуным ончыко чын виктараш тыршена, – ойлат ача-ава.
Усталык тораш наҥгая
Даниловмыт еш дене канаш моткоч йӧратат. Кеҥежым кажне гаяк арнян ер, эҥер воктене жапым эртараш ямде улыт. Колым кучат, тамле сийым ямдылат. Тора кундемышкат лектын коштыт. Саратов, Смоленск кундемлашке миеныт. Октябрьыште Моско олашке каяш йӧн лектын. Марина Гурьевна Настя ӱдыржӧ дене «Звучи в веках, родной язык!» всероссийский конкурсышто мастарлыкыштым ончыктеныт. Тушто коктын сылне марий мурым муреныт да кумшо верым сеҥен налыныт.
– Россий кӱкшытыштӧ тиде икымше ошкыл лийын. Мурым мурымынам видеошко войзыман да моторын сӧрастарыман ыле. Мыланна пагалыме туныктышо Любовь Леонидовна Пакалина полшен. Сеҥымеке, Москошко ӱжыныт. Тушто дипломым, пӧлекым кучыктеныт. Тӱрлӧ сылне верым ончен кошташат жапым муынна, – ойла ава.
