Кужэҥер район Йывансола тӱвыра пӧртыштӧ «Марий ӱдыр – сылне ӱдыр» районысо конкурс нылымше гана эртаралтын. Тений 14 гыч 20 ияш марте вич ӱдыр таҥасен (снимкыште). Кажныже шке койыш-шоктышыжым, чолгалыкшым, мастарлыкшым, марий койышыжым почын пуаш тыршен, уш-акылжым терген.
Марий ӱдыр ожнысек пашам йӧратыше, кидпашам ыштен моштышо лийын. Ты усталык конкурсышто аклалтын. Участнице-влакын ямдылыме пашаштлан жюри деч посна ончаш толшо-шамычат акым пуэныт. Сценыш лекмек, ӱдыр-влак шкешт дене палымым ыштеныт. Тидланже презентацийым ямдыленыт. Конкурсын вес йыжыҥже марий классик, поэт, кусарыше С.Г.Чавайнлан пӧлеклалтын. Уста еҥ дене кылдалтше йодыш-влаклан вашмутым пуаш кӱлын. Очыни, ик эн куштылго да кажныжын кумылжым нӧлтышӧ заданийлан тӱрлӧ сем почеш марла куштымаш шотлалтын. Йыр шогалын, ӱдыр-шамыч Кужэҥер, Медведево, Курыкмарий районла, Провой да эрвелмарий-влакын семышт почеш тавалтеныт, сценыште шкем кучен моштымыштым, кид-йол лывыргылыкыштым ончыктеныт. Мӧҥгысӧ паша семын кажне ӱдыр творческий номерым ямдылен.
Конкурсым иктешлымеке рашемын: онлайн йӱклымаште Кристина Шапкина сеҥен (Йӱледӱр). Тудак «Марий ӱдыр – сылне ӱдыр» номинацийыште палемдалтын. «Марий ӱдыр – мастар ӱдыр» таҥасыште Анна Андреева (Тошто Йӱледӱр) сеҥышыш лектын, Елена Иванова (Йывансола) – «Марий ӱдыр – ушан ӱдыр» таҥасыште, «Марий ӱдыр – койышан ӱдыр» таҥасыште Мария Бердникова (Кугу Лаждӱр) чылам ончылтен. Гран-при дене Кристина Быкова (Старсела) палемдалтын.
Авторын фотожо.
