Финн-угор калык-влак йоча савыктышлан кугу тӱткышым ойырат. Йоча газет, журнал-шамычым савыктат. Нунын кокла гыч иктыже – «Зечбур!» одо газет. Икымше номерже 1930 ийыште «Дась лу!» (Ямде лий!) лӱм дене ош тӱням ужын. «Зечбур» шомак «салам» манын кусаралтеш.
– Индешле утла ий жапыште газетна моткоч вашталтын. Буква-влак тыгыде лийыныт, тӱрлӧ чия шинчам куандарен огыл. Ондак шуко уверым шындаш тыршеныт. Кызыт мотор сӱрет дене сӧрастарена. Тукым вашталт толеш, садлан ме илыш деч вараш ынена код, – ойла корреспондент Алеся Главатских.
Оҥай лаштыкла
Палаш оҥай, газетыште могай лаштык, рубрике-влак улыт? Юнкор-шамычын возымо пашаштым «Гожтэтысь чуръёс» (Серыш гыч корныла) рубрике дене вераҥдат. «Йыг! йыгаським» (Тук-тук-тук) лаштык пеш оҥай. Унаже-влак тӱрлӧ аланыште тыршыше, кумдан палыме еҥ-влак улыт. Нуным лудшо-шамыч шке ойырат. Тидлан «ВКонтакте» соцкылысе тӱшкаш уверым пуат. Калык комментарийышке воза. Нине йодыш-влак дене корреспондент уста еҥ деке кая. Эн оҥай йодышым пуышо еҥлан лаштыкын геройжо «Зечбур» газетын блокнотшым автографым шынден кучыкта. «Комикс» лаштык ералашым ушештара. Тушто йочам иктаж-молан туныктышо мыскарам савыктат. Нунын почеш видеороликым ямдылат да соцкылышке вераҥдат. Роль-влакым Гири ден Капа модыт. Конкурс ден фестивальлаште ойыртемалтше, уста йоча-шамычлан «Ми дорын куноын» (Мемнан унана) рубрике уло. Тыгай рубрике-влакым шотлен от пытаре.
Усталык шӱлышан еш
Кызыт редакцийыште ныл еҥ пашам ышта: тӱҥ редактор, корреспондент, сӱретче да дизайнер. Тӱрлӧ школышко, ялышке коштыт. Йоча, туныктышо, ача-ава, коча-кова-влак дене вашлийыт. Илыше газетышт уло. Тудо мотор сарафанан. Газет шкеже, кылым ыштыме нерген каласкала, модышым эртара (снимкыште). Мутлан, тыге ойла: «Мый декем сӱретым колташ лиеш». Тыгодым йоча-влак доска ончыко лектыт да шинчам петырен сӱретлат. Видеом колташ лийме нерген ойла гын, илыше газет дене пырля куштат. Кызытсе технологий дене пайдаланен, «Зечбурым» тӱрлӧ семын пойдарат. Тӱрлӧ конкурсым ий еда эртарат. Марий Элысе савыктыш-влак денат пеҥгыде кылым кучат.
Чолга юнкорлан – путёвко
Эн шуко сӱретым колтышо, эн шуко почеламутым возышо, эн шуко заметкым серыше йоча-шамычым идалык мучаште але тӱҥалтыште палемдат.
– Нунын фотоштым икымше лаштыкыш вераҥдена. Чолга юнкор-влаклан удостоверенийым, йӧн лийме семын «Шундыкар» (Кечан ола) одо лагерьыш путёвкым кучыктена. Тыгак Башкортостан Республикысе «Усточикар» (Мастар ки-дан-влакын олашт) одо лагерь дене кылым кучена. Юнкор-шамыч ожнысо семын шуко уке улыт гынат, газет дек тӱрлӧ семын кумылаҥдаш тыршена. Паша кӱжгӧ, – ойлат редакций пашаеҥ-влак.
Тек лудшышт шуко лиеш, возаш кумылан-влак ешаралтыт, да чыла шонымашышт шукталтеш.
