– Мый шочмо мланде, ава нерген сылнымутым лудаш йӧратем. Михаил Якимовын усталыкше чонемлан лишыл. «Ял шеҥгелысе чоҥгашке кӱзен» почеламутшо келша, – ойла Параньга район Усола школын 8-ше классыштыже тунемше Аня УСОЛОВА. – Яков Павлович Майоров-Шкетанын чыла гаяк мыскара ойлымашыжым лудынам. Нуно кумылым нӧлтат да ожнысо илыш дене палдарат.
Аням Анфиса акаже почеламутым лудаш изинек кумылаҥден. Тиде койыш ӱдырым марий книгам шергалаш да конкурслаште мастарлыкым ончыкташ таратен. Аня акажын возымо «Усола ялем» почеламут дене тӱрлӧ конкурсышко ушнен да ятыр гана сеҥыше радамыш лектын.
