Черланаш огыл манын, чер деч аралалтман. Тидлан тӱрлӧ профилактике пашам шуктыман. Могай врачын полшен кертмыж нерген паледа? Лаштыкнан унаже – Марий Эл Республикын гигиене да эпидемиологий рӱдерыштыже тыршыше общий гигиене врач Е.А.КЛЁНОВА (снимкыште). Рӱдер Йошкар-Олаште верланен.
– Екатерина Анатольевна, ты профессийым ойыраш мо таратен?
– Оршанке район Кугу Кугланур школышто шым ий шинчымашым налмеке, Руэм посёлкышто верланыше Шуко профилян лицейын биологий да химий классышкыже тунемаш кусненам. Вара Угарман оласе Медицине академийыште уш-акылем пойдаренам. Врач профессийлан изинек шӱман улмем, кугыеҥ, йоча-влаклан полышым пуаш йӧратымем ойырымо корно дене пашам ышташ вийым ешарат. Изинек эмганен кушшо йоча-влак деке школышто тунеммем годымак коштынам. Кызытат нунын деч кораҥын омыл. Кеч ик жаплан ойгыштым мондыкташ манын, тӱрлӧ конкурсым эртарем. Чон йодмо сомылым ныл ий утла шуктем. Паша корнем Гигиене да эпидемиологий рӱдерысе кочмо отделенийыште тӱҥалын. Кызыт радиационный гигиене отделенийыште тыршем.
– Те могай сомылым шуктеда, еҥ-влакым эмледа мо?
– Ме черым кораҥдаш да тудын деч аралалташ полшена. Тудо ынже шарле манын тыршена. Йоча-влак йоҥылыш корныш ынышт шогал манын, школлашке лектын, вашлиймашлам, вашмутланымашлам эртарена, умылтарена.
– Тӱҥ шотышто могай темым тарватеда?
– Кыдалаш, кугурак классласе ӱдыр-рвезе-влак тамакым шупшаш ынышт тунем манын, профилактике пашам кажне ийын эртарена. Тиде аярын самырык организмлан могай эҥгекым ыштымыж нерген кажне йоча палышаш. Мыланна йолташ, психолог лияш перна. Кызыт уло тӱням шучко чер авалтен. Ты шотыштат пашам ыштена. Йошкар-Оласе, Медведево да Оршанке районласе школлашке лектын коштмо. Кидым чын мушмо, тӱшкаште шкем арален моштымо нерген мутланыме.
– Самырык тукымлан могай тыланымашда лиеш?
– Шкендам аралыза. Йодышда лектеш, полыш кӱлеш гын, каҥашым йодаш ида ӧр. Илышыште чын корным ойырыза.
