«Артек» тӱнямбал йоча рӱдер да тушто эн чолга ӱдыр-рвезе-влакын канымышт нерген икымше гана авам деч колынам. Тушко логалаш манын, шуко тыршыман улмаш. Икымше класс гычак тӱрлӧ конкурсышко, конференцийышке, олимпиадышке ушныман. Мыят мастарлыкемым да уш-акылемым чыла вере тергаш тыршенам. Эртыше тунемме идалык мыланем поснак лектышан лийын. «Язык – будущее народа» район-влак кокласе конкурсын «Презентация «Язык – культура», «Сочинение «Как говорят в моей семье» (англичан йылме дене), «Чтение стихотворения на русском языке» таҥаслаштыже сеҥышыш лектынам. «Восхождение» республикысе шанче-практике конференцийыште биологий дене кумшо лийынам, руш йылме дене – икымше. «Нам о России надо говорить» да «Наследники Великой По-беды» республикысе шанче-практике конференцийлаште ойыртемалтынам.
Икмыняр ийысе сеҥымашем поген, мыланемат «Артекыш» каяш йӧн лектын. «Артек – добрый мой учитель» латикымше сменыште каненам. Тушко ме, Российын тӱрлӧ кундемже гыч ӱдыр-рвезе-влак, миенна. Мый «Морской» отрядыш логалынам. Отряднан темыже теҥыз дене кылдалтше лийын. Ме морской кылдышым пидаш тунемынна, парусник дене теҥызыш лектынна. Тӱнямбал рӱдерлан келге шинчымашым пуымыжлан, чолгалыкым ешарымыжлан да у йолташым муаш полшымыжлан кугу таум ойлем.
Аня ВИНОГОРОВА.
Звенигово, Шолэҥер.
